Li paytexta Swêd Stockholmê bi civînekê Navenda Revenda (Dîaspora) Kurd hat damezrandin.

Piştî welatên Almanya, Belçîka, Hollanda, Finlandiya, Avusturya û Fransayê, 21ê Mijdarê li Swêdê jî Navenda Dîasporaya Kurd hate damezrandin.

Civîna damezranidanê, bi sirûda Ey reqîb destpê kir û ji bo giyanên şehîdan û Parêzgerê Hewlerê nemir Firset Sofî, deqeyek bêdengî ve rêz hat girtin.

Bi beşdariya birêz Tahir Hewramî, berpirsiyarê dosyaya Kurdên Dîasporayê li Baregeha Barzanî û Nûnerê Hikûmeta Herêma Kurdistanê birêz Bextiyar Berdman û Federasyonên Komeleyên Kurdistanî li Swêdê û nûnerên Navenda Revenda Kurd li Almanya û Finlandiya û rêxistinên federasyonên jin û akademîsyenên Kurd yên ji her çar parçeyên Kurdistanê û nûnerên xwuşk û birayên me yên Êzidî, Navenda Hêzên Siyasî yên Rojhilatê Kurdistanê û hunermendê navdar Öz Nûjen wek mêvan beşdar bûn.

Di konfransa damezrandina Navendê de Birêz Tahir Hewramî, axaftineke kurt kir. Piştî pêşkêşkirina struktura Navendê û armancên Navenda Revenda Kurd, dîtin û pêşniyarên beşdarên konfranse hate wergirtin. Piştî guftûgoyan ji bo Kongreya Asayî ya dahatî endamên Komîteya Birêvebir ji her çar parçeyên Kurdistanê û nûnerên Kurdên Rûsyayê û Êzidiyan hatin destnîşankirin. KB ji 11 kesan pêk hat û ew dê li gor pêşniyar û dîtinên beşdaran li ser destûrê bixebite. Komîteya Birêvebir, heta kongere dahatî wê kar di nav xwe de parve bike û li gor armancên xwe dest bi çalakiyên xwe bike. Konfrans bi atmosfereke germ, dilsozî, yekrêzî û bi helwesteke Kurdistanî bi dawî hat.