Rêveberê Tendirustiya Wanê Prof. Dr. Mahmut Sunnetçioglu ragihand ku ji sedî 98ê nexweşên corona yên li nexweşxaneyan razandî û ên di bin çavdêriya hûr de ew kesên ku derziya li dijî coronayê li xwe neda ne.

Rêjeya xwederzîkirinê li wî bajarê Bakurê Kurdistanê, ji sedî 61.5e û ev jî ne kêm e. Lê rêjeya tijebûna nexweşxaneyan jî ji sedî 90 derbas kiriye. Rêjeya nexweşên di bin çavdêriya hûr de ji sedî 63e.

Bajarê Wanê heta beriya destpêkirina lêdana derziyê jî, li ser asta Tirkiyê û Bakurê Kurdistanê di nava 5 bajarên baş ên rûbirûbûna corona de dihate hejmartin. Lê piştî destpêkirina lêdana derziyê, niştecihên bajar xemsarî kirin û bi rêjeyeke kêm herdû doz bikar anîn.

Mahmut Sunnetçioglu diyar ku xelkê parêzgehê guh nedan bikaranîna maske, xwedûrxistina ji hev û paqijiyê û ev jî bû sedem ku rêjeya pêketinê, serê 100 hezar kesî, bigihêje 278,14 kesan.

Sunnetçiohlu dibêje, ji sedî 98ê nexweşan derziya li dijî corona li xwe neda ne  û kesên ku herdû dozên derziyê li xwe dane û nexweş ketine, nakevin bin çavdêriya hûr.