Navenda Nûçeyan- Wezîrê Tendirûstîyê yê Tirkîyê, Fahrettin Koca duh Yekşemê ragihand ku ji destpêka erdhejê ve termên 39 kesan ji bin kavilan hatine derxistin.

Lê belê di demjimêr 02:00ê Duşemîyê de, li taxa Sûrsûrû ya li navenda Xarpêtê termê jineke 50 salî ya bi navê Sevîm Cambaz jî ji bin kavilên apartmaneke 4 qatî hat dîtin û bi vî awayî hejmara qurbanîyên erdheja Xarpêtê gihîşte 40 kesan.

Li gorî zanyarîyan, niha 2 kesên di bin kavilan de mane û hewlên rizgarkirin, an jî derxistina termê wan kesan berdewam in.

Duh Yekşemîyê cenazeyên 7 kesên din ku ji ber erdhejê canê xwe ji dest dabûn, bi axê hatin spartin.

Şeva Înê 24ê Çile erdhejeke mezin bi hêza 6.8 pileyên Rîxterê herdu bajarên Xarpêt û Meletî yên li Bakurê Kurdistanê hejandin û bû sedema gelek zirarên canî û maddî.

Li gelek bajarên din ên Bakurê Kurdistanê, Rojava û Rojhilatê Kurdistanê jî hest bi erdhejê hatibû kirin.