Platforma Ziwanê Kurdî û Tora Ziwan û Kulturê Kurdî kampanya îmzeyan a “Wa Kurdî Biae Ziwanê Fermî û Ziwanê Perwerdeyî” da dest pêkerdiş û lînkê kampanyaya zî ame vilakerdene. 

Lînkê kampanya îmzeyan wîna yo: 

Seba hetkarîya kampa zî nê çîya ameyê vatene:

Wa Kurdkî biba Ziwanê Resmî û ya Perwerdeyî

Her şar bi ziwanê xo est o. Senî ke ê verênanê ma vato “her teyr bi ziwanê xo waneno” û her şar kî ganî bi ziwanê xo biciwîyo.

Bi awanbîyayîşê netewe-dewletan gelek dewletan dest pê polîtîkayanê netewesazîyêka bi armancê komelêkê yewrenginî kerdo. Çar dewletanê ke kurdî kerdê binê destê xo kî seba raardişê komelêkê yewrenginî û yewziwaninî dest pê polîtîkayanê asîmîlasyonî kerdo. Nê warî de polîtîkayê tewr tuj û hişkî bi destê awanker û selahîyetdaranê dewleta tirkan ameyê/ênê tetbîqkerdene. Tirkîya de hîna kî perwerdeyîya ziwanê kurdkî bi madeya 42. ya qanunê bingeyînî ameya qedexekerdene. Destpêkê awanbîyayîşê komare ra heta nika seba asîmîlekerdişê kurdan û bêerjkerdişê ziwan û kulturê kurdan her tewir rayîr û metod ameyo xebitnayene.

Hişmendîya seserra 19. û 20.e de no helwest hetê hêzanê desthilatdaran ra sey çîyêkê rewayî ameyêne dîyene labelê na seserre êndî derbaz bîya û êndî aqilîyet û zîhnîyetê raardişê “komelêkê yewrenginî” zafêrîyê cîhanî de sey “qirkerdişê sipîy” êno namekerdene. Ewro êndî zafziwanî û zafkulturî sey çîyêkê lazim û rewayî êna dîyene. Şarê kurdan kî vera pêro polîtîkayanê asîmîlasyonî seba pawitiş û averberdişê ziwan û kulturê xo xoverdayîşê xo bêvind dewam keno.

Na yewe ra serkewte êndî dem ameyo ke ziwanê kurdkî bibo ziwano resmî û engelê verê kurdkî ganî bêrê hewadayene, kurdkî pêro dereceyanê perwerdeyî û musnayîşî de ganî bêra xebitnayene. Coka ma kesê ke nameyê xo cêr de yo wazenîme ke ziwanê kurdkî Tirkîya de bibo ziwano resmî û ziwanê perwerdeyîye.