Îngilîstan de ame tesbîtkerdene ke vîrusê Korona mutasyon bîyo û tewirêko newe yê Korona ame vînayîş. No tewiro newe yê Korona nika ra beno sebebê zêdîyayîşê endîşeyî.

Dima ke Îngilîstan de ame tesbîtkerdene ke vîrusê Korona mutasyon bi û tewirêko newe yê Korona vejîya werte xeylêk welatan seferê teyarayan betal kerdî.

Şêwirmendê zanistî yê hukmatê Îngilîstanî Patrick Vallanceyî rola şemeyî eşkerayîyêke daye û pare kerd ke varyantêko newe yê vîrusê Korona vila beno û nê varyantê neweyî ra menga kanûne de xeylêk kesî pê nêweşîye kewtî. Şêwirmendî da zanayene ke no varyant menga êlule de London de û şaristanê Kentî de ame tesbîtkerdene.

Doktorê serekî yê Îngilîstanî Chris Whittyî zî eşkera kerd ke no varyantê Korona 'hîna zêde' vila beno, hîna bitehluke yo, tedawîya ci kifş nîya.

Science Media Center zî ca da fikranê îmmunolog Peter Openshawî yê Zanîngehê Londonî. Openshawî ard ziwan ke no tîpo newe yê Korona se ra 40 heta 70 lezêr vila beno.

Reyna Zanîngehê Londonî ra Profesor John Edmundsî vat: ''No vîrus ê verî ra lezêr vila beno.''

Pisporanê Yewîya Neteweyîye zî îdîa kerd ke derzîna vîrusê Korona amade ya. Wezîrê Weşîye yê Almanua Jens Spahnî kanalê Almanya ZDF de qisey kerd û vat: ''No tîppo newe yê vîrusî derzînan ser o qet tesîr nêkeno.''