Fatma Yılmaz

Roja 08.05.2022î  de Momosteyê Kurdkî M. Malmisanijî Odeya Hesabdaranê Serbestan û Mişawîranê Malîyan a Dîyarbekirî de derheqê xonamekerdişê kirmancan (zazayan) û standardîzasyonê kirmanckî de semînerêk da.

 
Xeylê roşnvîr, hunermend, nuştox û sîyasetmedarê Kurdî beşdarê semînerî bîyî û eleqeyêko zaf pîl estbî semînerî rê.

Mamosta Malmisanjî qasê 2 saetan qisey kerd, qiseykerdişê xo de malumatê hîrayî dayî û tay îdîayanê xeletan yê rastnuştişî ser o hem rexneyê xo kerdî û hem zî ê îdîayê xeletî bi ispatan pûç vetî. 

Malmîsanijî va kirmanc û kird nameyê etnîk ê, zaza û dimilî  nameyê eşîran ê. Û ey bi delîlan va nameyo ke Grûba Vateyî seba şarê ma tercîh kerdo Kirmanc o. La nameyê bînî zî yê ma yê. No tena tercîhê grûb o. No mesele, meseleyêko sîyasî yo. Nameyê “Zaza û Dimil” nameyê eşîran ê, nameyê etnîkî nîyê. Bi belge û xonamekerdişê şarê ma no ispat bîyo. La na rastîye zî esta nê demanê peyênan de çekuya “zaza” tena bajaran de ney dewan de zî hîna zêdêr yena şuxulnayene.        

Malmisanijî derheqê rastnuşê kirmanckî (zazakî) de zî zanayîşî dayî, behsê xebata Grûba Xebate ya Vateyî kerd û çend nimûneyan ser o cewab da tay xeletîyê ke warê rastnuştişê ziwanî benê.

Qiseykerdişê M. Malmisanijî ra dima mabên ame dayîş. Mabênî ra dima beşê persanê meymanan de Mamosteyî bi hîrayîye cewab da persanê beşdaran.

Rûpela Nû / Dîyarbekir