Komîsyona 21’ê Sibate ke mîyan de Platformê Ziwanê Kurdî û Tora Ziwan û Kulturê Kurdî ca gênê, kampanyaya îmzeyan a “Wa ziwanê kurdî bibo ziwanê fermî” û “Wa ziwanê kurdî bibo ziwanê perwerdeyî” da dest pêkerdiş.

Komîsyone venga heme kurdan da ke wa dormeleyê kampanya de ca bigîrê û wayîrê ziwanê xo vejîyê. 

Komîsyona 21’ê Sibate ke mîyan de Platformê Ziwanê Kurdî û Tora Ziwan û Kulturê Kurdî ca gênê, Cemiyeta Rojnamegeran a Amedî de kombîyayîşê çapemenî tertîp kerd. Endam û rayberê Platformê Ziwanê Kurdî û Tora Ziwan û Kulturê Kurdî beşdarê kombîyayîşî bîyî. Beyanatê aşkerekerdişê kampanya bi lehçeyanê kurmancî û zazakî (kirmanckî) yê ziwanê kurdî û tirkî ame hadre kerdene. 

Nameyê Komîsyona 21’ê Sibate ser o Vervatoxê Platformê Ziwanî Kurdî Şerefxan Cizîrî beyant wend.

Beyanatê derheqê kampanyaya îmzeyan wîna yo:

SEMEDÊ HEQÊ ZIWANÎ KURDKÎ VENGDAYÎŞ

Ziwanê ma estbîyayîşê ma wo, ziwanê ma nasnameyê ma wo, ziwanê ma rûmetê ma wo… La çi heyf ke, qasê se serrîyo ke, sîyaseto serdest bi hukmê zordarî keno ke kurdan nê heqî ra bêpar verdo. Ma eşkenê vaje ke, wazenê wa kurdî estbîyayîşê xo ra dûrî bikewê, bê nasname û rûmete bimanê.

Ewro bi milyonan kurdî Rojhilatê Mîyanênî de raştê asîmîlasyonî yenê. Cografyaya ma de siyaseto serdest wazeno kurdan û ziwanê înan çîne biko. No siyaseto çewt, wazeno kurdan hetê ziwanî û kulturî ra çîne biko, la no teşebus, nê kerdenê înan çi rey nêbenê teşebusê demokratîkî û merdimayî.

Na kerdena înan vera fikir û ramanê seypeyî ya zî. Ganî no siyaseto çewt bêro terk kerdene û heqê kurdan yê ziwanî û nasnameyî bêro qebûl kerdene. Ziwanê Kurdkî ganî bi hawayêko resmî bibo wayîrê statûyêka qanûnî, Ziwanê Kurdkî ganî bibo ziwanê perwerdeyî. Ma bi rayberîya ‘Platformê Ziwanê Kurdkî’ û ‘Tora Ziwanî û Kulturê Kurdî’ kampanyaya îmzayan ya “Wa ziwanê kurdkî bibo ziwanê resmî”,“Wa ziwanê kurdkî bibo ziwanê perwerdeyî” danê dest pêkerdene. Kampanya do 22’ê na aşme de dest pêbiko û kampanya do 2 lingan ser o dewam biko. Lingêka ci, îmzayê fizîkî yê ke kuçe û kolanan ra do bêrê arêdayîş.

 Linga bîne zî îmzaya dîjîtal a. No, semedê kurdanê îmkanê înan çino ke xo biresnî formê îmzayanê rîbirî, hadre bîyo. Semedê kesanê ke kurd nîyê la hema merdimayî ra dûrî nêkewtê û wazenê peynîya nê şermê seserreyî bîyarê, na linge ameya hadre kerdene. Na kampanya çiqas bi namê Platformê Ziwanê Kurdkî û Tora Ziwanî û Kulturê Kurdî dîyena dest pêkerdene zî, kampanya bingehê xo de ya pêrûna kurdan a. Rêxistin, partî û fikrê ma çi beno wa bibo, ziwan, yê ma pêrûne yo, na kampanya semedê ziwanî ya, encamê ci semedê heme kurdan o.

Naye ra ma veng danê heme sazî, dezgeh, rîsipî, roşnvîr û kurdanê dinya; her çî ra ver kampanya yê şima ya, semedê ziwanê şima ya. Dormeleyê na kampanya de kom bibêne, na hêvîya se serran a ke kurdî qayîlê biresê ci, ma bike ke heqê xo yê ziwanî bigîre. Ma vengdayîşê pêrûna kurdan kenê: Ma pêro-pîya wayîrê nê waştişan vejîyê û bi zerrî ra beşdarê na kampanya bibê.

Ma bi na kampanya wazenê bi milyonan îmzeyan arê bide. Semedê kampanyaya ma her îmzeyêk qîmetin a, helwestêk a, vengêk a û zaf muhîm a. Na kampanya de imzeyê ma çiqas zêde bê, vera nîyetxiraban îrade û waştişê şarê ma hende pîl beno. Her cayê dinya de zî vengê şarê kurdî do hîna xurtêr bibo.

Semedê nê sedeman, ganî ma îmzayanê xo her cayê dinya ra arê bide û vengê xo berz bike.

Wa heme dinya bizano ke kurdî yew fek ra vanê: Wa ziwanê kurdkî bibo ziwano resmî. Wa ziwanê kurdî bibo ziwanê perwerdeyî.

KOMÎSYONA 21Ê SIBATE