Serekê Armenîstanî pare kerd ke seba qedînayîşê şerê Karabagî ey morê xo da binê peymanêka 'dejine'. Serekdewletê Rûsya zî îfade kerd ke ê do 'hêzê haştîye' herême de ca bikerê.

Serekwezîrê Armenîstanî Nîkol Paşînyanî hesabanê xo yê medyaya dîjîtale de eşkerayîyêke daye û da zanayene ke seba ke mabênê Azerbaycan û Armenîstanî de şer biqedo ey morê xo da binê peymanêka 'dejine'. Paşînyanî vat: ''Na peymane serkewtişêk nîya la binkewtişêk zî nîya.''

Qesra Kremlînî zî xebera peymane tesdîq kerde. Azerbaycanî zî nê eşkerayîyan ra verî pare kerd ke konrolê şaristanê Şûşa kewt destê ci. Şûşa Karabagî ra 15 kîlometreyan dûr a û noqtayêka stratejîk a.

Serekdewletê Rûsya Vlademir Putinî zî ard ziwan ke ê do Karabag de hêzanê haştîye ca bikerê. Putinî eşkera kerd ke wird perrî zî pozîsyonê xo yê nikayênî de do bimanê.

Dima ke Azerbaycanî bi şaşî Armenîstan de helîkopterê Rûsya vistwar peymane ameye îmzakerdene.