Merkezê Xeberan- Pêvînayîşê lîderanê DYA û Fransa ra dima çar hetê pêvînayîşî seba ke meseleyî ke Tirkîya NATOyî de ardî meydan çare bikê ameyî têhet. Nê pêvînayîşî ra dima zî ame parekerdene ke nêzelalîyî nêameyî çarekerdene.

Serekkomarê Fransa Emmanuel Macronî yo ke bi vatişê ''mezgê NATOyî merd'' kewtibi rojeve û Serekê DYA Donald Trump reyde ame têlewe. Macronî pêvînayîşî ra dima beyanat da û Tirkîya rexne kerde. Macronî seba ke Tirkîya sîstemê pawitişî yê hewayî yê endamêkê NATOyî ney ê Rûsya hêrîna nêrazîbîyayîşê xo mojna.

Pêvînayîşî ra dima mabênê Serekkomarê Fransa Emmanuel Macronî, Serekwezîra Almanya Angela Merkel, Serekwezîrê Brîtanyaya Pîle Boris Johnson û Serekkomarê Tirkîya Recep Tayyîp Erdoganî de babeta rojeva Sûrîye ser o kombîyayîşêk ame kerdene. Emmanuel Macronî îfade kerd ke alozîyê Sûrîye yê ke bi îşxalê Tirkîya yê vera Rojawanî hîna zêde bîyî têmîyan hema zî zelal nêbîyî. Macronî vat seba ke krîz bêro çarekerdene xebatî dewam bikê.

Macronî derheqê fikrê lîderanê Almanya û Tirkîya yo ke vat ''pêvînayîş baş bi'' wezîfeyo verên ê Fransa têkoşînê vera DAÎŞî yo. Nê vatişanê Macronî ra yenê famkerdene ke Fransa cewab da tehdîdê Tirkîya ke wazena YPG sey terorîst bêro qebulkerdene û îşxalê Tirkîya yê vera Rojawanî bêro şinasnayene. Macronî da zanayene ke Tirkîya tim babeta ''tehlukeyê asayîşî'' akena û vat: "La ganî ma xo vîr ra nêkerê ke kamî vera DAÎŞî şer kerd."

Macronî heman roje de bi beyanatêkê xo zî eşkera kerdibi ke Tirkîya hetkarî dana DAÎŞî û  ci rê eskeran erşawena.