Malbata Şenyaşar bi cîgirê Wezîrê Dadê Ramazan Can re civiya ye.

Parlamenterê Partiya Çep a Kesk ê Rihayê Ferît Şenyaşar û Emîne Şenyaşar bi cîgirê Wezîrê Dadê Ramazan Can re civiya ne. Malbata Şenyaşar roja duyemîne Nobeta xwe ya Edaletê li Enqereyê didomîne.

Malbata Şenyaşar ji bo Wezîrê Dadê Yilmaz Tûnç re hevdîtinê bikin çûne ber avahiya Wezareta Dadê.

Malbata demekî dirêj li ber wezaretê hatiye rawestandin pişt re ji bo ku bi cigîrê Wezareta Dadê Ramazan Can re hevdîtinê bikin girtin hundirê avahiyê. 

Li gorî nûçeya Ajansa Mezopotamyayê li derdora Wezareta Dadê bergiriyên ewlehiyê yên zêde hatin wergirtin. Weke duh îro jî rojnamevan ji aliyê polîsan ve ji qadê hatine dûrxistin. 

Malbata Şenyaşar duh ji Meclisê heta Wezareta Dadê meşiyabûn lê negirtîbûn avahiya wezaretê û ji bo nekevin wezaretê jî deriyê wezaretê ji aliyê peywîrdarên ewlehiyê yên li wê derê re hatibû girtin. 

Çi bûbû?

Di 14ê Hezîrana 2018an de di dema xebatên hilbijartinê yê Îbrahîm Halîl Yildiz, parlamenterê Rihayê yê AKPê de êrişa çekdarî pêkhatibû.

Di encama êrişê de Mehmet Şah Yildiz, birayê Îbrahîm Halîl Yildiz, Haci Esvet Şenyaşar û kurên wî Adil û Celal Şenyaşar miribûn.

Fadil Şenyaşarê ku di pevçûnê de bavê wî û herdu birayên wî candabûn û bi xwe jî brîndar bibû, li Nexweşxaneya Lêkolînê û Perwerdeyê ya Gazî Yaşargîl a Amedê hatibû desteserkirin û piştre dadgehê biryara girtina wî dabû.