Nuştox, ziwannas, tarîxnas û akademîsyenê kirdî M. Malmîsanij kitabê xo yo newe vet. Kitabê bi nameyê '1925'ten Önce Ayrilma Taraftari Kürt Örgütleri' (1925î ra Verî Rêxistinê Kurdan ê Terefgîrê Cîyabîyayîşî) hetê Weşanxaneyê Vateyî ra weşanîya.

Kitab de tarîxnas Malmîsanij 7 rêxistinanê kurdan ser o vindeno, derheqê înan de zanayîşan dano ke nê 7 rêxistinî 1925 ronayîşê Komara Tirkîya ra verî nîyayê ro û înan waştêne ke Kurdîstanêko Azad do bêro ronayene.

Kitab de qala nê rêxistinan yena kerdene:

-Cemiyet-i İstihlas-ı Kürdistan

-Kürd İstiklal Komitesi

-Kürdistan Teali Cemiyeti

-Kürd Demokrat Fırkası

-Kürd Teşkilat-ı İçtimaiye Cemiyeti

-Kürdistan İstiklal ve İstihlas Komitesi.

M. Malmîsanijo ke qezaya Pîranî ya Amedî ra yo, serranê dergan ra nata ziwan û edebîyatê kirdkî de eleqedar beno û ronayox û endamê Grûba Xebate ya Vateyî yo.

Malmîsanijî heta nika derheqê ziwan, edebîyat, tarîx û cografya de xeylêk kitabî nuştî. Malmîsanij bi taybetî babetanê tarîxîyan ê Şex Seîd û Bedîrxanan de sey pispor o. Malmîsanijo ke bi serran Swêd de sey surgun ciwîya nika Amed de ciwîyeno û Unîversîteya Artûkluyî de Beşa Ziwan û Edebîyatê Kurdkî de mamostatî keno.