Meclîsê Sûrîyeya Demokratîke (MSD) û Partîya Îradeyê Şarî paytextê Rûsya Moskova de pêvînayîşêk kerd.

Hemsereka Komîteya Rayberdişî ya MSDyî Îlhame Ehmed û Serekê Partîya Îradeyê Şarî Kadîr Cemîlî paytextê Rûsya Moskova de kombîyayîşêkê çapemenîye yo hempar kerd. Dima zî seba çareserîya sîyasî ya Sûrîye muzakereyêke ameye îmzakerdene û Wezîrê Karanê Teberî yê Rûsya Sergey Lavrovî reyde kom bîyî.

Îlhame Ehmed derheqê pêvînayîşî de wina vat: ''Ma rewşa Sûrîye ser o kom bîye. Ma nîqaş kerd ke prosesê muzakere do senîn bo, meseleyê Sûrîye senî çareser benê û ma senî tewrê muzakere benê.''

Sîhanok Diboyî zî bale ante girîngîya protokolê mabênê MSD û Partîya Îradeyê Şarî ser û vat: ''Seba çareserîya meseleya kurdan a Sûrîye goreyê qanûnan îradeyê şarî do sey esas bêro girewtene û rêxistinkerdene.Reyna bale ameye antene rolê QSDyî yê vera terorîstan ser. Ganî MSD tewrê Komîteya Qanûnê Bingeyî yê Sûrîye bibo.''

Cigîrê Serekîya Heyetê Rayberdişî ya MSDyî Hîkmet Hebîbî ANHA rê netîceyê pêvînayîşî ercnayî û vat: ''Ma Wezaretê Karanê Teberî yê Rûsya reyde goreyê bira 2254î nîqaş kerd. Rûsya wazena ke MSD tewrê xebata komîteya qanûnê bingeyî bibo. Pêvînayîşan de hêrişê dewleta tirke zî bîyî rojdem.''

Madeyê muzakereya mabênê MSD û Partîya Îradeyê Şarî wina yê:

''Rewşa nikayêne û alozîya Sûrîye ya ke kewte serra 10. bingeyê krîzî yo. Mudaxeleyê teberî zî alozîye kenê zêdêr û pêro polîtîkayê leşkerî û asayîşî bêmana manenê.

Ganî pêro terefê Sûrîya seba qedînayîşê şer, krîz û alozîye têbigêrê. MSD û Partîya Îradeyê Şarî bi mesuldarîya çareserîya krîzî ameyî têhet û muzakere îmza kerde.

Madeyê muzakere wina yê:

1-Sûrîyeya newîye de erd û şarê Sûrîye yew ê. Sûrîyeya newîye demokratîk a û tede têdûştî û edaleto komelkî esto. Sûrîyeya newîye bi kurd, ereb, sûryan, asûr, tirkmen, armen û çeçenan sereberz a. Sûrîyeya newîye de pêro xebatî do bi hawayêkê hemparî bêrê caardene, îradeyê şarî her cayê ci de do xo bimojno.

2-Çareserîya sîyasî tek rayîrê qedînayîşê alozîya Sûrîye ya. Na çareserîye serdestî û îradeyê şarî esas gêna û heman wextî de beyan kena ke şarî bi dîyalogan eşkenê bira çarenusê xo bidê. Bi nê hawayî her di terefî zî wazenê ke madeya 2254î do bêra caardene. Na bire deklare kena ke Sûrîye serdest biba, ambargoyê vera Sûrîye biqedê, mudaxele, şer û îşxalî biqedê. 

3-Bi erkê hemwelatîyê têdûştî Sûrîye de meseleya kurdan bi hawayêkê edîl û demokratîkî do bêra çareserkerdene. 

4-Îdareyo Xoser ê Rojawanî seba rewşa welatî hewcedarîyêk o. Seba qedînayîşê alozîyan zî girîng o. Ganî tecrubeyanê Îdareyê Xoserî ra îstîfade bêro kerdene.

5-Artêşa Sûrîye dezgehêko leşkerî yo û do qet tewrê sîyasetî nêba. QSDyo ke vera terorî şer keno û şarî dormeyê ci de ameyî pêser, ganî tewrê artêşa Sûrîye bêro kerdene.

Goreyê naye her di terefan zî pêkerd ke têkilîyî bêrê xurtkerdene. Her di terefan zî bi xurtî ard ziwan ke ganî MSD tewrê prosesê sîyasîyî û komîteya qanûnê bingeyî bibo.''