Serokê Odeya Bazirganî û Pîşesaziya Amedê (DTSO) Mehmet Kaya beşdarî bultena Rûdaw TV bû û serdana Serokê Herêma Kurdistanê, Nêçîrvan Barzanî bo Tirkiyê û bandora wê li ser bazirganiya navbera herdu aliyan nirxand.

Mehmet Kaya ragihand, serdana Nêçîrvan Barzanî dê banoreke erênî li bazirganiya navbera Tirkiyê û Herêma Kurdistanê bike û got, eger peywendiyên navbera Herêma Kurdistanê û Tirkiyê berfirehtir bibin, dê hem asta bazirganiya me zêdetir bibe û hem jî dê pirsgirêka bêkariyê kesên ku diçin wê derê kar dikin çareser bibe.

Kaya amaje bi berdewamiya têkiliyên aborî û bazirganiya di navbera Tirkiyê û Herêma Kurdistanê de kir û diyar kir, qebareya bazirganiya navbera herdu aliyan ne weke berê ye û bi taybet piştî referandumê daketiye. Kaya got, Tirkiye ku pêştir hertim di rêza sêyem a şirîkê bazirganiyê yê Iraqê de dihat, niha daketiye pileyên heftem û heştem.

Serokê Odeya Bazirganî û Pîşesaziya Amedê tekez kir ku Herêma Kurdistanê girîngtirîn partnera bazirganî ya Tirkiyê ye û diyar kir ku wan di hevdîtinên xwe yên li gel Wezîrê Derve yê Tirkiyê Mevlut Çavuşoglu de tekezî li ser asayîkirina rewşê û rakirina astenên li pêş bazirganiyê kirine.

Mehmet Kaya diyar kir ku bi daketina hinardekirinê li Tirkiyê gelek kargeh hatin girtin û got, “Ji sedî 65ê hinardekirina Amedê bo Herêma Kurdistanê ye. Li gor 3 salên derbasbûyî ji sedê 40 kêmbûnek heye. Eger peywendiyên siyasî asayî bibin û asteng bên rakirin, ew kargehên li Tirkiyê yên bazirganiyê li gel Iraqê dikin dê geş bibin û hinardekirin dê zêde bibe. Kargehên hatine girtin jî dê dîsa vebin.”

Serokê Odeya Bazirganî û Pîşesaziya Amedê tekezî li ser wê jî kir ku hindî tifaqa AK Partiyê li gel MHPê berdewam be egera nêzîkbûna Kurdan li AK Partiyê lawaz e.

Rudaw