Nivîskar, berhevkar û lêkolînerê Kurd Mehmet Oncu ragihand ku ev 40 sal in bi karê berhevkirina folklor Kurd û wêjeyê ve mijûl e û ew dixwazî li ser wî karê xwe berdewam bike.

15emîn Pêşangeha Pirtûkan a Navnetewî li Hewlêrê berdewam e û ji Bakurê Kurdistanê jî 2 weşanxane têde beşdar in ku ew jî Avesta û Sîtav in.

Hejmareke nivîskar jî ji Bakurê Kurdistanê hatine û pirtûkên xwe ji nivîskaran re îmze dikin. Yek ji wan nivîskaran jî Mehmet Oncu ye ku nêzîkî 40 sal in li ser ziman û nivîsên Kurdî kar dike û hejmareke projeyên wî jî hene.

Mehmet Oncu yê 62 salî ji nava wê pêşangehê behsa berhem û karê xwe ji Rûdawê re kir.

Oncu got: “Ez li bajarê Semsûrê dijîm. Ev 40 sal in bi berhevkariya folklora Kurdî ve mijûl im. Herwiha ligel karê berhevkirinê ez bi wêjeya Kurdî re jî mûjil im û min gelek berhem weke roman, helbest û çîrok nivîsandine. Berhema min a herî dawî romana bi navê Mij e, ez tê de behsa serdama rûxîna dewleta Osmaniyan û destpêka avabûna Komara Tirkiyê dikim. Çîroka wê ji sala 1895an destpê dike û heta sala 1944 didome. Berî wê jî min berhemeke folklorîk nivîsandibû bi navê Gotinên Pêşiyan. Ev berhem ji gelek gotinên pêşiyan pêk tê. Min pêşiyê ev li gor mijaran dabeş kiribû û tê de 239 mijar hene weke yên li ser avê, agir, hevaltî, aborî… Di vê berhemê de her beşek li gor alfabeyê hatiye rêzkirin û her gotinekê min şerhê wan nivîsandine û yên hebin min çîrokên wan nivîsandine. Herwiha yên hinek gelek varyantên wan hene û min ew jî nivîsandine.”

Nivîskarê Kurd diyar kir ku ew berhema wî Weşanxenya Sîtavê çap kiriye û gihişt li ber destê gelek kesan û got: “Ez ji bo ked û hewldanên Weşanxaneya Sîtavê gelek minetdar û xweşhal im.”

Derbarê berhema xwe ya bi navê “Ferhenga Biwêjan” de jî Oncu got: “Berhema min a Ferhenga Biwêjan jî berhemeke medanî ye. Berî ku berhema Gotinên Pêşiyan bê weşandin berhema Ferhenga Biwêjan hat weşandin. Tê de 9 hezar biwêjên Kurmancî hene û li her herêmê û li her deverê min berhev kirine û hemû min şîrove kirine û şehrê wan nivîsandine û piştre jî min di nav hevokê de bikar anîne. Herwiha çîroka gelek biwêjan jî hene.”

Oncu herwiha got: “Bi tevahî ez tam nizanim hejmara berhem xwe lê ez dibêjim gihiştine 40an û piraniya wan ji Weşanxaneya Sîtavê çap bûn, lê berê wê jî weşanxaneyên weke Avesta, Dara û Nûbaharê berhemên min çap kirine. Herwiha gelek şaredarî û wezaretan jî berhemên min ên li ser xwarin û vexwarinên Kurd çap kirine. Eger temenê min têrê bike ez dê li ser folklor û edebiyata Kurdan karê xwe berdewam bikim.”

Rûdaw