Dewa Lîçikî ya qezaya Kanîreşî ya Çewlîgî de hîrê serrî yo mexdûrê erdlerzî hema zî konteyniran de ciwîyenê. Dewijan ard ziwan ke dewlete sozê ke dabî nêardî ca.

14ê hezîrana 2020î de Çewlîg de bi girdîya 5.8î erdlerz qewimîyabi. Erdlerz de 22 bînayî rijîyabi û 214 bînayan de zî texrîbat qewimîyabi.

Dewa Lîçikî ya qezaya Kanîreşî ya Çewlîgî de zî mexdûrê erdlerzî 2020 ra nata konteyniran de ciwîyenê. Dewijan PÎRHA rê qisey kerd û pare kerd ke dewlete ê mexdûr kerdê, sozê xo qetî nêardo ca.

Dewije Nacîye Kahraman îfade kerd ke erdlerzî ra dima çew wayîrê înan nêvejîyayo û vat: ''Erdlerzê Îzmîrî de dewlete paştî daye înan. Ma hê konteyniran de ciwîyenê. Oyo ke serekê dewlete yo eşkeno rojêke zî konteyniran de bimano? Zimistan ameyo hema zî keyeyê mi nêvirazîyayê. Înan hende sozî dayê ma la qetî nêardê ca.''

Çelebî Kahramanî da zanayene ke keyeyê înan ameyo rijnayene la herinda ci de keyeyêk zî nêameyo viraştene. Kahramanî vat: ''Dewlete qet destek nêda ma. Zimistan zehmet o, seba ke soba çin a ma pê ceyranî xo kenê germin. La faturaya ceyranî zî zaf zêde ya. Seba ke konteynir eşyayanê ma nêgêno eşyayê ma teber de yê. Bi serran o ê vanê keyeyê ma hê qedîyenê.''

Kemal Tekînî vat: ''Emser zî keyeyê ma do nêrê viraştene. Zimistanî seba ke serd ê ma şinê hetê domananê xo. Ganî keyeyê ma hînî bêrê teslîmkerdene. Ma heta nika dewlete rê ardim nêdî.''