Mîkaîl Aslanî koyanê Dêrsimî de Seyîd Riza û embazê ci yad kerdî û vat: '' Ê rayîrê ma yê, roşnî danê. Seyîd Riza û hevalê ci royê ma, royê kirmancîye yê. Ma înan xo vîrî ra nêkenîme.''

Hunermend Mîkaîl Aslanî koyanê Dêrsimî ser ra mesajêkê bi vîdeo pare kerd û serrgêra 83. ya dardekerdişê Seyîd Riza û embazanê ci de ê yad kerdî. Mîkaîl Aslanî vîdeo hesabanê xo yê medyaya dîjîtale ser o vila kerd.

Mîkaîl Aslanî medyaya dîjîtale de nuşt ke ''Vera ê kesanê ke celad û qrurbanî pîya yad kenê ma perrê rûmetî de yê. Sey vizêr ewro zî.''

Mîkaîl Aslanî vîdeoyê xo de wina qisey kerd:

''Şarê ma yo qedirgiran,  ez nika koyanê Dêrsimî ra veng dana. Seyîd Riza wexto ke vejeno meydanê Xarpêtî, hukmatê tirkî xape eştbi milî.  Nîyadano (ewnîyeno) dormeyê xo sarê ci lewê ci de nîyo. La hende ant ke zerrîya xo teng nêkerde û dormeyê xo nîyada. Vengê xo meydanê Xarpêtî de gulbang da û va ke  'bêxeta yîme û bêguna yîme, Ewladê Kerbelayî me.' Sarê ci dorme de nêbi la ey zanitêne ke  vengê ci yo ke ê meydanî de gulbang dano hînî vîndî nêbeno. Raşta zî o vengê ci resa ma. Roze bi roze, serre bi serre. Azê ma vengê înan hesîneno, xîretê înan fam keno. Nêke se serrî hezar serrî  ravîyaro kî xîretê înan ê serewedaritina înan xo vîrî ra nêkenê. Ê rayîr û rêçê ma yê, roşnî danê. Seyîd Riza û hevalê ci royê ma, royê kirmancîye yê. Ma înan xo vîrî ra nêkenîme. Royê kirmancîye, esaletê kirmancîye do nêmiro. Silam û hûrmetî.''