Navenda Nûçeyan- Yek ji kesayetên malbata mîrên êzdîyan dîyar kir ku sala 2014ê ve heta naha xelkê Şingalê ti xweşî nedîtine. Em dixwazin derîyekî xêrê bo xelkê Şingalê bê vekirin û xelkê me bikarin vegerin Şingalê. Gelek giringe hemû grup û hêzên neqenûnî Şingalê vala bikin.

Yek ji kesên malbata Mîrên êzdîyan Mîr Dasin Mîr Faruq beg ji BasNewsê re ragehand: ‘’Ev çend sale çend grup û alîyên sîyasî dest bi ser Şingalê de girtine. Heta naha wan grup û alîyên sîyasî nekarîne ti xizmetekî bo Şingalê bikin. Em dixwazin hemû xelkê me bibin yek dest û yekrêz bin û xemxorê parastina berjewendîya gel û ava kirina Şingalê de bin. Em dixwazin milmilana sîyasî li Şingalê nemîne. Ji ber ew milmilana sîyasî di berjewendîya grup û alîyên sîyasî yên neqanûnî de ye û ne di berjewendîya êzdîyan de ye. Tenê karê têkdanê naha li Şingalê tê kirin.’’

Herwaha got: ‘’Heta hêzên Pêşmergeyên Kurdistanê û PDK ne vegere Şingalê, êzdî navegerin. Ji ber tenê PDKê xwedî li êzdîyan û berevanîyê li mafên wan kirîye. Naha jî xelk li bendê ne baskê PDKê vegere Şingalê û ewlehî li Şingalê ava bibe, ku dest bi avadanî û jîyanê li Şingalê bê kirin.’’