Merkkezê Xeberan- Hemvervatoxê PYD’yî Salih Muslîmî vat: ''Pêkerdişo ke bi rejîmî ame kerdene pêkerdişêko fermî yo û na gama verên a. Seba ke zerîya ci bêro dekerdene do pêvînayîşî bêrê viraştene. Soz ame dayene ke do sahaya hewayî teyareyanê Tirkî rê bêro qefilnayene.''

Hemvervatoxê Partîya Yewîya Demokratîke (PYD) Salîh Muslîmî ajansê ma rê pêkerdişê Îdareyê Xoserî yê Vakur û Rojakewtena Sûrîye û dewleta Sûrîye ercna.

''Salih Muslîmî da zanayene  ke amancê nê pêkerdişî pawitişê şarî yo û va: ‘‘Pêkerdişo ke bi rejîmî ame kerdene pêkerdişêko fermî yo û na gama verên a. Seba ke zerîya ci bêro dekerdene do pêvînayîşî bêrê viraştene.  Semedê pawitişê Sûrîye ma do pîya tê bigêrê. Leşkerê Sûrîye do Dêrik ra heta Firatî bêrê cakerdene û beyraqê Sûrîye do bêro berzkerdene. Leşkerê Sûrîye do teberê bajarî de bimanê.  Îdareyo Xoser do xebatanê xo rê dewam bikero. Verî ancîyayîşê Amerîka Rûsan û Rejîmî pêkerdiş qebul nêkerdêne. La nika qebul kerd. No çîyêko verên o, pêvînayîşî do dewam bikerê. Nê pêkerdiş de çîyo tewr muhîm oyo ke Efrîn zî tede ca geno. Badê caardişê asayîşê herême do semedê xelisnayîşê Efrînî zî pîya bêro xebitene. Çend rojî cuwa pê do Şam de pêvînayîşî bêrê viraştene û naskerdişê Îdareyê Xoserî yê Demokratîkî û Qanûnê Bingênî de naskerdişê heqanê Kurdan do bêrê destgirewtene. Goreyê pêvînayîşan do çarçeweya pêkerdişî hîra bo.‘‘

Muslîmî ard ziwan ke nika têna Rûsya eşkena nê pêkwtişan vindarno û wîna dewam kerd: ‘‘Amerîka nêeşkayî pêkewtişan vindarnê ya zî nêvindarna. Amerîka semedê menfeatanê xo vera Tirkîya nêvejîyena. Meseleya ma eşkera ya û tewr zaf dewleta Sûrîye eleqedar kena. Çend rojan de hemsencîye ameye bedilnayene. Coka Rejîm û Rûsya nê pêkerdiş qebul kerd. Çîyo tewr muhîm caardişê nê pêkerdişî yo. Ma do pratîk de vînê no pêkerdiş pêkewtişan vidarneno ya zî nêvindarneno.  Xoverdayîşo biheybetî heme hêzî mecbûr verdayî ke newe ra bifikîryê. Şer do dewam bikero.  Tirkîya bi heme hêzê xo hêriş kena. Leşkerê Sûrîye vera hêrişan şer nêkenê, ma do şer bikerê. La leşkerê Rejîmî sînor de bi estbîyayîşê xo do bandura Sûrîye temsîl bikerê. Sozêko bîn zî ame dayene ke sahaya hewayî teyareyanê Tirkî rê bêro qefilnayene. No zî do paştî bido şervananê Xoverdayîşê Anorî.‘‘

Muslîmî vatişê Serekê Amerîka Donald Trumpî yê ‘Beno ke Kurdî seba ke ma bifînê mîyanê nê şerî tayî çeteyî veradayî‘  wina cewab kerd: ‘‘Ma çew serbest vera nêda. Êyê ke remayî netîceyê hêrişê dewleta Tirkî yê vera kampe û zîndanan de remayî. Eyn Îsa de leşkerê Amerîka zî estbî.  Gama ke Tirkan bombavaran kerdêne qey ê bêveng mendî û Tirkî nêvindarna? Krîmînalîzêkerdişê Kurdan çewî rê nêdano qezenckerdene.‘‘