Serekê Pêroyî yê Partîya Welatparêzanê Kurdîstanî (PWK) Mustafa Ozçelîk:

Serrgêra Partîya Welatparêzanê Kurdistanî (PWK) Pîroz Bo!

Netîceya xebata hempare ya yewbîyayîşê sîyasî û rêxistinî de, PAK (Partîya Azadîya Kurdistanî) û TDK-TEVGER (Tevgera Demokratîk a Kurdistanî) û kesanê xoserî 9-10ê êlula 2023î de Dîyarbekir de kongreya yewbîyayîşî viraşt û 10ê êlula 2023 de, Partîya Welatparêzanê Kurdistanî (PWK) amey ronayene.

Ewro serrgêra yewine ya ronayîşê PWK ya.

PWK, partîyêka ke meşrûîyetê xo heq û huqûqê miletê kurdî ra gena û xebata eşkere esas gêna. Semedo ke PWK sey partîyêka qanûnî zî xebatê xo bikero, ma dest bi prosedurêk kerd. Goreyê nê prosesî û prosedurî, PAK 17ê êlula 2023 de, Anqara de binê muşadeheyê Komîsyonê Weçînayîşî yê Çankayayî de kongreya xoya hîrêyîne viraşte. Na kongreya resmî de, Partîya Azadîya Kurdistanî (PAK) nameyê xo sey Partîya Welatparêzanê Kurdistanî (PWK) wurna ke PWK qadê eşkere û resmî de bieşko kar û xebatanê xo yê sîyasî û rêxistinî bikero.

Helbet, her çiqas nameyê PWK ameyo qebûlkerdiş zî la dawaya girewtişî ya ke seba PAK abîyaybî, nika bi nameyê PWK do dewam biko.

PWK, heqê çarenusî yê miletê kurdî pawena

PWK, meseleya Kurd û Kurdîstanî sey persê heqê çarenusî yê milletê kurdî (heqê tayînkerdişê qederê xo), yanî mesele ya dewletbîyayîşî vînena. Partîya ma, dewletbîyayîşî (dewleta federal, konfederal yan zî xoser) sey program û amancêka demderg û stratejîk vînena. No war de, goreyê şert û mercanê Kurdistanî û tevgera rizgarîxwazîya neteweyî û goreyê rewşa herême û mîyanneteweyî, eke çareserîyê cîya û mîyanqonaxî vejîyê meydan, ma do nê çareserîyanê demkî û mîyanqonaxîyan zî red mekê û înan seba amancanê sereke û stratejîkan sey fersetêko muhîm bihesebnê.

PWK heqanê ziwanî, kulturî, demokratîkî yê kurdanê ke metropolanê Tirkîya de ciwîyenê pawena. Bajaranê metropolanê Tirkîya yê ke nufûsê kurdan tede zafane yo, heqê xoîdarekerdişê herêmî yê şarê kurdî wazena.

PWK, bi vîzyon û mîsyonê xo merkez û adresêko newe yo

PWK, partîyêka neteweyî, demokratîke, ya şarî, eşkere û qanûnî ya. A seba heqê çarenusî û heqanê neteweyî, demokratîkî û kulturî yê milletê kurdî û ûnsûranê etnîkî û dînî yê Kurdistanî û seba heqanê kurdan yê metropolanê Tirkîya de ciwîyenî xebetîyena. A bi hawayêko pêroyî xo berdewamîya tevgera azadî û rizgarîxwazî ya neteweyî ya Kurdistanî vînena; heme xoverdayîş, serewedartiş û destkewtişanê azadî û rizgarîxwazîya neteweyî wayîr vejîyena.

PWK warê sîyasî de, pawitiş û xurtkerdişê xeta neteweyî û kurdistanî Kurdîstanê Vakurî de sey wezîfe û vîzyonê xoyo esasî vînena. Nê vîzyon û mîsyonî reyde, PWK, bingehê îdeolojî, nîjad û sınıfan ser o nê; la bingehê hemwelatîya Kurdistanî ser o û sey partîyêka eşkere, qanûnî, neteweyî û demokratîke xo organîze kena.

PWK, wazena bi hawayêko hîra cematê kurd û kurdistanîyanê welatparêz û demokratan yê dîndar, sekuler, sosyalîst, lîberal û muhafezekaran mîyanê refanê xo de arê kero û înan rêxistin bikero. Her çiqas no war de vernîya ma de rayîrêko derg û zehmetin esto zî PWK nika ra bîya merkezêka esasî û cayê hêvîyêka newe.

PWK, bi sîyaset û helwesta xo, bi ekonomîya xoya xosere, bi kultur û hişmendîya kulturê xebata hempar, demokrasî û azadîya zereyî, hurmetê vera partî, rêxistin û tevgeranê kurd û kurdistanîyan, partîyêka xosere, milî, demokrate, xobexş û azadîxwaze ya.

PWK, kombîyayîş û îdarekerdişê zereyî de, beyanatanê xo yê seba rayagiştî û zereyê partî de ziwanê kurdkî (kurmanckî û kirdkî/zazakî) sey ziwanê esasî û resmî yê PWK xebetnena. PWK cehd kena ke endamê aye yê ke qiseykerdiş û nuştişê kurdkî de zehmetî ancenê xo nê war de aver berê; embazê ke kurmanckî qisey kenî bimusê kirdkî/zazakî û embazê ke kirdkî/zazakî qisey kenî zî bimusnê kurmanckî.

Partîya Welatparêzanê Kurdistanî (PWK) seba yewbîyayîş, pûya xebatkerdiş û ittîfaqan yew nimûne ya û no war de hertim zî amade ya.

Seke deklerasonê xo de zî îfade kerdo, PWK, meseleya yewbîyayîş û pîya xebatkerdişê hêzanê sîyasî û demokratîkanê Kurdîstanê Vakurî bi hawayêko pêroyî hîrê nuteyan de vînena. Meseleya yewbîyayîşê sîyasî û rêxistinî; meseleya pîya karkerdiş û îttîfaqanê stratejîkan yê partî û rêxistinanê kurdistanî û meseleya pîya xebate û viraştişê platformanê ke waştişanê acîlan ser o yew temsîlîyetê neteweyî.

No war de sîyasetê PWK zaf zelal o. PWK vana ke: Partî û rêxistinê ke warê sîyasî û waştişanê stratejîkan de sey yewbînan ê, nêzdîyê yewbînan ê, wa bibê yew û mîyanê yew partî de kom bibê; ê ke nêşenê bibê yew, wa pîya xebate û ittîfaqan virazê; ê ke nêşenê pîya xebate û ittîfaqan bikerê, wa berê dîyalog û têkîlîyan megîrê û ê ke nêşenê yewbînan de dîyalog zî virazê, qet nêbo wa dijminatîya yewbînan mekerê.

PWK, xebate û têkoşîna ke vera asîmîlasyonî ya û pîya xebata ke waştişanê acîlan ser o ya yew wezîfeyo giran vînena!

PWK, xebate û mucadeleyo ke vera sîyasetê asîmîlasyon û jenosîdî yê ke ziwan û kulturê kurdkî ser o dewam kenî, wina zî pawîtişê ziwanê kurdkî û averberdişê ey sey yew wezîfeyê xoyo esasî û acîl vînena. Partîya ma no war de û seba waştişanê acîlan yê miletê kurdî, pîya xebatkerdiş, viraştişê platform û ittîfaqêko tewr hîra ewro yew îhtîyaco esasî vînena; seba nê îhtiyacî xebat kena û do xebat, cehdkerdiş û têkilîyanê xo de berdewam bo.

Ganî ma cehd bikerê ke keyeyê ma, partî, rêxistin û tevgerê ma yê sîyasî; dezgehê sîvîlî û komelayê ma yê kulturî, herêmî û sosyalî yê ke qada cuya rojane de estê kombîyayîş, fealîyet û weşananê xo de her di lehçeyanê kurdkî (kurmanckî û kirmanckî/zazakî) sey ziwanê esasî û serekî kar bîyarê. Ganî ma bi keyfweşî dîyar bikerê ke kombîyayîş, qiseykerdiş û weşananê PWK bi na berpirsîyarî û hişmendîye yenê ravîyarnayîş û na hişmendî roj bi roj mîyanê rêzanê PWK de xurt û hîra bena. Helbet xebat û fealîyetanê zaf alîyan de karardişê ziwanê tirkî zî yew parçe yo rastîya ke ma tede ciwîyenê ra yo.

PWK, partîyêka bêîtaetîya sivîl a

Bingehê xebat û têkoşîna partîya ma Kurdîstanê Vakurî yo. Seba caardişê amancanê xoyê neteweyî, demokratîk û kulturî, partîya ma do bê ke şîdet kar bîyaro heme rayîr û metodanê xebat û têkoşînî yê meşrû, eşkere, sivîl, demokratîk û bêîtaetîya sivîl pîya kar biyaro.

Partîya ma bi bername, destûr û deklerasyona xo û bi şeklê ronayîş û xebata xo yew nimûneyê partîyêka bêîtaetîya sivîlî ya.

PWK, destkewtişanê her parçeyê Kurdistanî sey destkewtişanê miletê kurdî vînena!

PWK, heme parçeyanê Kurdistanî de heqê çarenusî yê miletê kurdî sey heqêko tewr meşrû vînena û pawena. Bêguman her beşê Kurdistanî do goreyê şert û mercanê xo forma azadî û hukumdarîya beşanê xo awan bikero.

Her çiqas wext, rayîr û metodê ci nika ra nêrê texmînkerdene zî yewbîyayîşê miletê kurdî û Kurdîstanî heqêko meşrû û rewa yo. La no war de ganî miletê kurdî û şarê kurdistanî bi îradeyê xoyo azad qerar bidê.

PWK, piştgirîya destkewtişanê federalî yê Herêma Kurdistanî û piştgirîya destkewtişanê Rojavayê Kurdistanî kena, pawitiş û averberdişê nê destkewtişan xo rê sey wezîfeyeko neteweyî vînena. PWK, her çar parçeyanê Kurdîstanî de waştoxê yewbîyayîş û pîyakarkerdişî ya û îttifaqanê neteweyîyan û niştmanîyan wazena. Mîyanê beşanê Kurdistanî de têkilî, piştgirî û mîyanê partî, rêxistin û dezgeyanê neteweyî û kurdistanî de yewbînî rê hurmetkerdişî sey binghêko esasî vînena.

PWK têkilîyanê mîyanneteweyî û dîaspora kurdî de bi hişmendîya ke dijminê ma kêm, dostê ma zêde bibê xebetîyena

PWK, têkilîyanê xo yê mîyanneteweyî de menfeatê milletê kurdî û Kurdistanî esas gêna û sîyasetê xo goreyê ney prensîbî rayîr ra bena. Têkilîyanê xoyê mîyanneteweyî de bingehê sîyasetê partîya ma do dost û piştgiranê xo zêdekerdiş û dijminanê xo zî kêmkerdiş bo. Partîya ma dîplomasî û sîyasetê xoyo mîyanneteweyî esla dijminatîya tu miletî ser o awan nêkena. La partîya ma, sîyasetê xoyo mîyanneteweyî de vera neheqî û bêedaletî vindena û piştgirîya xebat û têkoşînanê seba azadî, demokrasî û edaletî kena û paştdana xebat û mucadeleyê miletanê bindestan.

Dîaspora kurdî bi xebate û bi têkilîyanê xo yê mîyanneteweyî beşêk têkoşînê miletê kurdî û kurdistanîyan ra ya. La çi heyf o ke ewro dîaspora kurdî merkez û banêko muşterek ra bêpar a. Ma na bawerî de yê ke ganî heme hetê ke ewro estê no war de bi musulîyet û bi hişmendîyêka neteweyî û kurdistanî hereket bikerê.

Seba ke dîaspora kurdî binê merkez û banêko muşterek de bêro têhet, hemahengî û hurmetê mîyanê nînan virazîyo, ganî ma bi heme hêz û îmkananê xo cehd bikê û bixebetîyê. Seba caardişê nê amancî, ma sey PWK amade yê ke bi heme hêz û kesanê eleqedarî reyde têkilîyan ronê û cehd bikê ke bi hawayêko hempar çareserîyêk na vilabîyayîş û zafsereyî rê bivînê.

PWK, do xebat û çalakîyanê xo yê cîya-cîyayan bi hawayêko ahengdar geş û xurtêr bikero

PWK, na serra vîyarte de, bi heme hêz û imkananê xo ceht kerd ke seba dawa rizgarîxwazîya neteweyî û demokratîke xebat û sîyasetêka xosere û bi şexsîyet teqîb bikero. PWK, ronayîşê xo ra heta ewro, derheqê rojeva Kurdistanî, rojanê taybetîyan yê tarîxî û serewedaritişanê kurdan de û seba vîrardişê şehîd û pakrewananê kurd û Kurdistanî de zaf konferans, semîner û çalakî viraştî. Winî zî goreyê hêz û imkananê xo PWK welatanê Ewropa de zî zaf xebat û çalakî organîze kerdî û cehd kena ke seba piştgirîya dawa rizgarîxwazîya neteweyî û demokratîke ya Kurdistanî, seba xebatanê kulturî û komelkîyanê kurdanê teberê welatî bibê veng û rengêko newe.

La bêguman zerrîya ma waştêne ke ma bieşkên na serra vîyarte  de xebat û çalakîyanê hîna xurt û hîrayîyan bikerdêne, sey partî ma hîna biquwet û hîrayêr bibînên. La na rewşe, şert û konjonkturo ke esto de û winî zî bi nê îmkan û derfetanê xoseran yê ke destanê ma de yê, ma eşkayî hende bikerê. Bêşik, no war de eke kêmanî û xeletîyê ma estê, ma do nînan zî analîz bikerê tera ders bigerê. La, tewrê heme kêmasîyan zî, ma bi heme bawermendî û dilsozîya xo semedê dawa azadîya şarê xo do xebatate û mucadeleyê xo de berdewam bê.

PWK, hişmendî û zanayîşê kêmanî û xeletîyanê xo de ya; a partîyêka xorexnegîr a, tesbîtkerdişê kêmasîyanê xo ra nêtersena û no war de do timûtim bi rexnegîrî, weşbînî û mesulîyet hereket bikero. Ma na bawerî de yê ke tewrê heme kil û kêmanîyan zî partîya ma na serra vîyarte de, geşkerdiş û hîrakerdişê zafrengin û zafdengîyê sîyasetê Bakurê Kurdîstanî de rolêko pozîtîf kay kerdo û do no sîyaset û helwesta xo de dewam bikero.

PWK, na bawerî de ya ke seba ke dînamîzma ciwanan û hêza cinîyan bêtir mîyanê refanê partîya ma û tevgera rizgarîxwazîya neteweyî-demokratîke de ca bigêrê; mîyanê xebata sîyasî, kulturî, komelkî de bi hawayêko rêxistinî û aktîf bixebitîyê; geşkerdişê komelê kurd û kurdistanî de rolêko hîna aktîf kay bikerê, ganî ma rewşe û wextê nikayî bi hawayêko komelkînasî û pisporî newe ra analîz bikerê. No war de ganî ma pispor û aliman ra zî îstîfade bikerê. Ganî ma goreyê wext û rewşa ke esta, bi rayîr û metodêka newe hereket bikerê.

Bi nê fikr û bawerîyan û bi na hişmendî, serrgîra ronayîşê PWK de, ez heme ronayanox, îdarekerdox, endam û alîgiranê PWK zerrî û can ra pîroz kena.

Ez serrgêra ronayîşê PWK de veng dana heme ronayanox, rayîrraberdox, endam û terefdaranê PWK ke wayîrê keda xo vejîyê û hîna zaf ceht bikerê ke PWK bibo partîya ciwanan û cinîyan, bibo partîya heme reng û venganê cematê Kurdistanî. Ez na bawerî de ya ke ma do serra ke yena xo seba gamêka xortêr û aktîfêr amade bikerê.

Serrgêra ronayîşê PWK de, ez veng dana heme kadroyanê welatparêz, azadîxwaz, demokrat û kurdistanîyan ke wayîrê xeta neteweyî, demokratîk, azadîxwaz û kurdistanî ya PWK vejîyê. Hêvî û ameyoxê miletê kurdî û heme kurdîstanîyan na xete de yê. Bîrên ma pîya na xeta neteweyî û kurdistanî xurtêr û hîrayêr bikerê.

Biciwîyo xebat û têkoşîna ma ya seba heqê çarenusî yê miletê kurdî û kurdîstanîyan!

Biciwîyo Partîya Welatparêzanê Kurdistanî (PWK)!

10.09.2024

Mustafa Ozçelîk

Serekê Pêroyî yê Partîya Welatparêzanê Kurdîstanî (PWK)