Baroya Amedê îro yekşemî 11ê Nîsana 2021an, 47mîn Kongreya xwe ya giştî li Navenda Kongreya Çandê ya Şaredariya Bajarê Mezin a Amedê pêk anî û di kongreyê de Nahît Eren bi dengê piraniya beşdaran weke serokê nû yê Baroya Amedê hat hilbijartin.

Kongreya Baroya Amedê îro ji demjimêr 09:00ê sibehî ve dest pêk kir û demjimêr 17:00 li gor dema Amedê dawî lê hat.

Di kongreyê de sê kes; Cîhan Aydîn, Nahît Eren û Cengîz Baysal ji bo serokatiya baroyê xwe berbijêr kiribûn.

Piştî birêveçûna dengdanê, sindoqên dengdanê hatin vekirin û di hilbijartina dengan de diyar bû ku Nahît Eren bi 693 dengan piraniya dengên delegeyên beşdar di kongreyê de misoger kiriye û weke serokê nû yê Baroya Amedê hat hilbijartin.

Cîhan Aydîn ku heya berî kongreyê serokatiya Baroya Amedê dikir, nekarî careke din baweriya piraniya delegeyan bidestbixe û di rikeberiyê de 594 deng bidestxistin.