Serokê Herêma Kurdistanê Nêçîrvan Barzanî gihişt Koşka Elyseeyê.

Serokê Herêma Kurdistanê Nêçîrvan Barzanî di çarçoveya serdana xwe ya Fransayê de li Parîsê ye.

Serokê Herêma Kurdistanê Nêçîrvan Barzanî gihişt Koşka Elyseeyê û dê bi Serokkomarê Fransayê Emmanuel Macron bicive.

Serokatiya Herêma Kurdistanê ragihand ku Nêçîrvan Barzanî li ser vexwendina fermî ya Emmanuel Macron çûye Parîsê.

Di navbera Parîs û Hewlêrê de pêwendiyên bihêz hene û ev çend car in Serokê Herêma Kurdistanê diçe Fransayê û bi Serokkomarê Fransayê re dicive.

Tê pêşbînîkirin ku di civînê de ev babet bên gotûbêjkirin:

- Şerê DAIŞê

- Ewlehiya Hêzên Hevpeymaniya Navdewletî yên li Îraqê

- Reformên Pêşmergeyan û rola Fransayê ya di van reforman de

- Pêwendiyên Hewlêr û Bexdayê û talebên Fransayê yên ji bo çareseriya pirsgirêkan

- Petrol û gaz

- Guvaşa Îraqê û helwesta Fransayê ya di mijara hinartina Petrola Kurdistanê de

- Ewlehiya hêzên Fransayê yên li Îraq û Herêma Kurdistanê

Ji aliyê din ve Serokatiya Herêma Kurdistanê li ser civîna Nêçîrvan Barzanî û Macron daxuyanî da

Serokatiya Herêma Kurdistanê li ser hevdîtina her du aliyan daxuyaniyek belav kir.

Li gorî daxuyaniyê, pêwendiyên dualî, danûstandinên di navbera Hewlêr û Bexdayê de, ewlehiya siyasî ya li Îraqê, rewşa aborî û geşedanên li herêmê hatin gotûbêjkirin.

Herwiha her du aliyan diyar kir ku pêwîst e Fransa di çarçoveya rêkeftina stratejîk a di navbera Îraq û Fransayê de, pêwendiya xwe ya bi Îraq û Herêma Kurdistanê re pêşve bibe û hevkariya di navbera wan de bihêztir bike.

Li gorî daxuyaniya Serokatiyê, Nêçîrvan Barzanî û Emmanuel Macron destnîşan kir ku ji bo aloziyên li Îraqê pêwîstî bi çareseriyê heye.

Serokatiya Herêma Kurdistanê herwiha da zanîn ku Nêçîrvan Barzanî û Emmanuel Macron geşedanên li Rojhilata Navîn jî nîqaş kirin.

Her du aliyan anîn ziman ku pêwîst e belavbûna şer bê astengkirin û ya herî girîng jî pêwîst e sivîl bêne parastin û alîkariyên mirovî neyên astengkirin.

Her du aliyan eşkere kir ku berdewamiya rewşa heyî dê bandorê li ser aştî û aramiya herêmê bike.

Di civînê de herwiha gefên DAIŞê, têkoşîna li hemberî terorê, pêwendiyên Îraq û Hikûmeta Herêma Kurdistanê ya bi welatên cîran û herêmê re û geşedanên li Sûriyeyê hinek ji mijarên girîng ên ku hatin gotûbêjkirin bûn.