Serokê Herêma Kurdistanê Nêçîrvan Barzanî bi boneya 6emîn salvegera komkujîya Kurdên Êzidî peyamek belav kir û tekez kir, "Em soza ji bo kesukarên revandîyan dûpat dikin li lêgerîn û rizgarkirina wan û hewldana ji bo zanîna çarenûsa wan berdewam dibin."

Nêçîrvan Barzanî di wê peyamê de amaje bi wê dike, “Îro bi êşeke kûr ve bîranîna şeş salîya Jenosayda Êzidîyan û karesata Şingalê dikin. Bi rêz û rûmetê ve wan hemû xwîşk û birayên me yên Êzidî bi bîr tînîn ku bûne qurbanîya tawankarîyeke bêhevtaya terorîstên DAIŞê. Ti kesekî bawer nedikir di sedsala bîst û yekê da mirovayetî careke din mergesateke wiha dibîne ku hemû cîhanê şok dike. Silav û dirûd ji bo gîyanê pakê qurbanîyên karesata Şingalê û tevahîya xwîşk birayên Êzidî.”

Serokê Herêma Kurdistanê dibêje, “Di demekê de vê bîranîna bi êş dikin, mixabin hê jî ji birîna xwîşk û birayên me yên Êzidî xwîn jê diçe û bi hezarên wan li wargehên koçberîyê dijîn. Şingal û navçeyên din ên Êzidîyan hê jî nehatine avedankirin û bingeheke baş ya vegerana aramîyê û vegerana jîyana wan tê de nîne. Şingal kirine warê çekdarên neyasayî ku bi bêxemîyê ve li ser birîn û xema Êzidîyan de mijulî birêvebirina ajanda û bernameyên xwe yên sîyasî ne.”

Nêçîrvan Barzanî di dewama peyama xwe de dûpat dike, ku “Herêma Kurdistanê li ser hewlên xwe yên ji bo dabînkirina aramî û vegerandina aramî û avedankirina Şingalê û kirina bi parêzgehê de berdewam dibe. Ji bo vê mebestê li gel Hikûmeta Federalîya Iraqê û îdareya parêzgeha Mûsilê hemû hevkarî û hemahengîyekê dike. Her wiha li ser asta navdewletî jî kar dike heta ku bi hevkarîya Neteweyên Yekgirtî û Unitad vê tawanê bi jenosayd binasênin û tawankaran jî didin dadgehê û qurbanîyan qerebû dikin.”

Serokê Herêma Kurdistanê got jî, “Xwîşk û birayên Êzidî bi hezaran salan li ser warê xwe bawerî û ola xwe parastine û herdem sedemeke girîng û çalak ya çanda pêkvejîyanê û lêborînê bûne û herdem jî her wiha dimînin. Em di vê salvegerê de tekezîyê li ser kûrkirina wê çandê dikin û hemû pêkhatên olî û neteweyî piştrast dikin ku Kurdistan bi landika aram û parastîya me hemûyan dimîne. Her wiha soza ji bo kesukarên revandîyan jî dûpat dikin li lêgerîn û rizgarkirina wan û hewldana ji bo zanîna çarenûsa wan de berdewam dibin.”

Di dawîya peyama xwe de Serokê Herêma Kurdistanê dibêje, “Silav li gîyanê pak ê wan Pêşmergeyên qehreman ku bi serpereştîya raste rast ya cenabê Serok Mesûd Barzanî, Şingal rizgar kirin û bo wê navê da gîyanê xwe bexşîn. Spas û pêzanîn ji bo wan hemû kesên li navxwe û derve hevkarîyê pêşkêşê Êzidîyan kirin. Xwîşk û birayên Êzdî piştrast dikîn ji bo dabînkirina dadperwerî û paşerojeke baştir herdem li gel wan da dibîn."