Nûnertiya Neteweyên Yekbûyî ya ji bo Alîkariya Iraqê ku bi navê UNAMI tê nasîn, pêşwazî li rêkeftina navbera Hewlêr û Bexdayê ya li ser mijara Şingalê dike.

Jeanine Hennis-Plasschaert, Nûnera Taybet a Neteweyên Yekbûyî ya li Iraqê di daxuyaniyekê de diyar kir: “Em pêşwazî li rêkeftina navbera Hewlêr û Bexdayê ya li ser Şingalê dikin. Ev destpêka pêngaveke girîng e ber bi arasteyekî rast.”

Plasschaert eşkere kir: “Em hêvîdar in ku ev rêkeftin rê li ber siberojeke baştir veke.”

Jeanine Hennis-Plasschaert destnîşan kir: “Di sala 2014an de DAIŞê tawana herî dirindane li hember Êzidiyan encam da û Şingal rûbirûyî janeke mezin bû. Piştî têkbirina DAIŞê jî, ji ber tinebûna xizmetguzarî û neseqamgîriya rewşa ewlehiyê û tinebûna îdareyeke yekgirtî, qurbanî û rizgarbûyiyên destê DAIŞê nekarîn vegerin cih û warên xwe.”

Herwiha di daxuyaniyê de Jeanine Hennis-Plasschaert amadebûna Neteweyên Yekbûyî ji bo alîkarîkirina her pêngavekê li ser asayîkirina rewşa Şingalê û avakirin û aramkirinê, nîşan da.

Wezîrê Navxwe yê Herêma Kurdistanê Rêber Ehmed piştî civîna ligel Serokwezîrê Iraqê Mistefa Kazimî ragihandibû ku bi amadebûna Neteweyên Yekbûyî û nûnerên Herêma Kurdistanê û Bexdayê, rêkeftineke baş hat kirin ji bo asayîkirina rewşa ewlehî, serbazî û îdareya Şingalê.

Rêber Ehmed herwiha diyar kir; armanca me her du aliyan ew e ku rewş were asayîkirin û aware vegerin cih û warê xwe.

Vê êvarê, Berdevkê Serokwezîrê Iraqê Ehmed Mela Telal jî li ser hesabê xwe yê Twitterê ragihand; Hikûmeta Herêma Kurdistanê û Hikûmeta Navendî ya Iraqê li ser mijara Şingalê li hev kirin.

Ehmed Mela Telal eşkere kir ku rêkeftineke dîrokî li ser mijara Şingalê di navbera Hikûmeta Herêma Kurdistanê û hikûmeta Bexdayê de hat kirin.

Telal destnîşan kir ku ev rêkeftin dawî li desthilata grûpên nexwestî yên li deverê tîne û ji bo cardin avakirina Şingalê û vegera xelkê wê, rê vedike.

(K24)