Navenda Nûçeyan- Nevîyê Şêx Seîd, Kasim Firat ku di heman demê de Serokê Komeleya Şêx Seîd e, li Amedê piştî nimêja Înê daxuyanîyek belav kir û nerazîbûn nîşanî daxwaza Partîya Vatan a ji bo rakirina remz û navên Şêx Seîd û Seyîd Riza da û got, “Em wan baş nas dikin, ew dixwazin kuştina Kurdan berdewam bikin. Ew ên ku ziman û hebûna Kurdan qebûl nedirin bi salan êriş kirin. Bila bizanin em ne ji zimanê xwe û ne jî ji nirxên xwe dest bernadin.”

Kasim Firat dîyar kir ku Şêx Seîd rûmeta gelê Kurd e û got ku êrişeke berfireh li ser nirx û çanda Kurdan heye û lê tekez kir ku Kurd serî li ber zext û fişaran natewînin. Nevîyê Şêx Seîd aşkere kir ku ew dê derbarê Dogu Perînçek û partîya wî de, li dadgehê gilî tomar bikin.

Serokê berê yê Baroya Amedê, Mehmet Emîn Aktar jî got ku li her dera cîhanê nefret weke tawanekê tê hesibandin û dîyar kir, “Îro gorên Şêx Seîd û Seyîd Riza ji ber vê yekê dîyar nînin. Em dê li ser vê êrişa li ser nirx, ziman û bîra gel, gilî tomar bikin. Tawaneke handana xelkê ji bo kerb û dijmintîyê heye.”

Partîya Vatan a di bin serokatîya Dogu Perînçek de, serî li parêzgarîyên Amed û Dêrsimê daye bo ku remz û navên ji herdu ji rêberên Kurdan, Şêx Seîd û Seyîd Riza ji şeqam, kolan, qad û hemû tabelayên li wan bajaran bên rakirin.

Herdu rêberên şoreşên Kurdan, Şêx Seîd 29ê Hezîrana 1925an û Seyîd Riza jî 15ê Mijdara 1937an ji alîyê hikûmetên Tirkîyê yên wê demê ve hatibûn darvekirin û heta niha jî gorên herdu rêberên Kurdan jî ne dîyar in.