Hunermendê Kurd Nîzamettîn Arîç, bersiva gotina Serokê Giştî yê Partiya Demokrasî û Pêşdeçûnê (DEVA) Alî Babacan a “Em dê astengiyên li pêşiya perwerdeya bi zimanê dayikê rakin” da û ji xwest ku di çareserkirina pirsa Kurd de wêrektir be.

Serokê Partiya DEVAyê Alî Babacan pêr li Enqerê li ser perwerdehiya bi zimanê dayikê ragihandibû, divê xala 42emîn a Destûra Bingehîn a Tirkiyê bê guhertin û ji bilî zimanê wan ê fermî Tirkî, divê di perwerdeyê de mafê bikaranîn û pêşxistina zimanê dayikê di destûrê de cih bigre û di bin garantiya destûrê de be.

Hunermendê navdar Nîzamettîn Arîç jî, derbarê mijarê de li ser hesabê xwe yê Twitterê peyamek arasteyê Babacan kir û got, "Tişta ku tu dibêjî baş e, lê hinekî din wêrekî pêwîst e."

“Projeyek ji bo çareserkirina pirsgirêkan amade bike”

Arîç bo Babacan dibêje “Ez bawerim, hûn jî bawer nakin ev pirsgirêka sed salî ya Tirkiye û Kurdistanê bi du hevokên xweş were derbaskirin. Madem zimanê me yê dayîkê ji bo we gelek girîng e, wê demê ser seran, ser çava, rûnin û projeyeke çareseriyê amade  bikin û bidin ber me.”

“We Kurd kirin Tirk û Kurdistan jî kir Tirkiye"

Arîç diyar kir ku ji ber têgihîştina dewletê, pirsgirêkên mezin derdikevin holê û wiha pê de çû: “Ji bo ku hûn me Kurdan asîmîlê bikin tiştek nema we nekir. We kilamên me dizîn û kir muzîka gelêrî ya Tirkî, we govendên me dizîn kirin govendên gelêrî yên Tirkî, we xalîçe û mehfûrên me dizîn kirin xalîçeyên Hereke-Konya, we nav û zimanê me qedexe kir, we ji bo guhertina demografiya me hemû hêza xwe bikar anî, we Kurd kirin Tirk û Kurdistan kir Tirkiye. Jixwe sirgûn, komkujî û kuştinên ku kiryarên wê ne diyar ên berdewam birîneke kûr e.”

“Mafê perwerdeya bi zimanê zikmakî ne xêr e, mafê mirovî ye”

Hunermendê Kurd herwiha destnîşan kir ku mafê perwerdeya bi zimanê dayikê ji mirovbûnê tê û got: “Ez dubare dikim, ji bo çareserkirina vê pirsgirêkê, divê hûn projeyên saxlem, bi hişê zanistî û wijdana mirovî û li gorî serdema nûjen bi pêş bixin û bînin li ber me. Mafê perwerdeya bi zimanê dayikê divê di bernameya her partiyeke siyasî de xala herî girîng be. Ev ne xêr e, lê mafekî mirovî ye.”

“Di siyasetê de bi niyeta baş kar naçin serî”

Di berdewamiya peyam xwe de Arîç, anî ziman ku dewlet mafê perwerdeya bi zimanê dayikê ji Kurdan dûr dixe û got: “Dewleta we her tim Kurd ji vî mafî bêpar hiştine. Hûn dizanin ku di siyasetê de bi niyeta baş kar naçin serî. Ez rêz ji niyeta we ya baş re digirim, lê bi gav û projeyên berbiçavtir werin û werin em hewl bidin ku rêyên cihêreng bi hev ve girê bidin.”