Şubeyê OHDyî yê Anqara raporê xo yê derheqê qirkerdişê keyeyê Dedeogullariyî de eşkera kerd. OHDyî da zanayîş ke, ganî tehqîqato xoser û zelal do bêro kerdene.

Şubeyê OHDyî yê Anqara raporê xo yê derheqê qirkerdişê keyeyê Dedeogullariyî eşkera kerd. 

Rapor de ame vatiş ke, cîrananê keyeyî Keleş û Çalikî ferdanê Dedeogullariyî rê 15 serrîyo bi hawayêko sîstematîk nîjadperestîye kerdêne û hêrişê vera keyeyî 10 serrî verî dest pêkerdo. 

Rapor de dîya zanayîş ke, 12ê gulane de Yahya Çalik, Velî Keleş, Lutfu Keleş, Alî Keleş û Ramazan Çalik pê daran hêrişê Metîn û Bariş Dedeogullariyî kerd û dima ra zî hêrişkeranê bînan pê kardî û daran hêrişê keyeyî kerd.

Rapor de wina ame vatiş: ''Hêrişkeran vat ê nîjadperestê tirkî yê, ê do kurdan tîya ra bivejê. Yaşar Dedeogullariyo ke nê hêrişî de birîndar bibi vat ke, 10 serrî yo mabênê înan de problem esto û sebebê nê problemî zî kurdayetîya înan a. Rapor de dîya zanayîş ke 12ê gulane de ferdê keyeyî raştê hêrişî ameyî û Bariş, Sîbele, Metîn, Yaşar, Serape, Serpîle Dedeogullari hêriş de birîndar bîyî.

Cayê hêrişî de 3 kamerayî estê. Deşîfrasyonê kameraya baxçeyî ame kerdene la dozgerîye pare kerdo ke kamerayê hetê çepî û peyê keyeyî hema nêameyî deşîfrekerdene. Heman wext de ame vatene ke hêrişker merdimê keyeyê hêrişkerî yo û hema nêtepişîyayo. Goreyê xeberanê çapemenîye hêrişker birayê Ayşe Keleş o.

Hêrişker verî salone de ferdanê Dedeogullariyî de qisey keno, dima çeke vejeno, ferdê keyeyî xo erzenê hêrişkerî ser, endamê keyeyî wazenê çeke destê ey ra bigêrê la hêrişker xo xelisneno û dano 7 kesan rı. 20 fîşekî dekewenê keyeyê Dedeogullariyî. Hêrişker dima şino wesayîtê xo wazeno benzîn bîyaro û keyeyî bivêşno. Dima ke beşêkê baxçeyî vêşeno hêrişker remeno.''