Merkezê Xeberan- Mustafa Ozçelikî Kanalê K24î rê qisê kerd û  va “12ê na menge de, nameyê ê hetan ser ê ke ewro kombîyayîşêk kenê, mektubêk PAK rê amo erşawitiş ke wa PAK sey muşahid beşdarê kombîyayîşî bibo. Ma muasayê ke eynî mektub PSK û HAK-PARî rê  zî amo erşawitiş. Mesulê PAKî zî qerar dayê ke beşdarê kombîyayîşî  nêbê. Heto bîn ra PSK zî sey me qerarê beşdarnêbîyayîşî da. Ma her di Partiyan bi beyanatêk sebebê beşdarnêbîyayîşê xo aşkere kerd.

Sedemê sereke yê hadrenêbîyayîşê ma: Îtîfaqê Neteweyî yeno manaya, êyê ke mîyanê îtîfaqî de ca gênê gere neteweyî û niştimanî bê. Programê ê hetanê beşdaran gere programêko neteweyî/niştimanî bo. La aktorê kombîyayîşê ewroyî HDP, DBP yê. HDP xo sey partiyêka Tirkîyeyî nîşan dana. Vana ma do Neteweya Demokratîke ya Tirkîya awan bike. Vana: Tirkîya welatê ma yo hempar o. Senî beno  ti warzî insiyatifê îtîfaqê niştimanî/neteweyî Kurdî/Kurdistanî bigîrî dest? No çîyêko maqûl nîyo!

Îtîfaqê neteweyî: Bingehê pawitişê heqanê neteweyî ser, qezenckerdişê statu seba netewe, seba Kurd/Kurdistanî yo. Programê HDP de no esto? Yan çin o!

HDP aşkere vana, ma partîyêka seba ronayîşê demokrasîya Tirkiya yê. Bêguman PAK demokrasî û pawitişê demokrasi hewl vînenê. La, qederê Kurdan ti nêeşkenê Anqara, Bexda, Şam û Tehranî rê girê bidî!