“Ewro 8ê Adare Roja Cinîyanê Dinya ya. Çi heyf ke her cayê dinya de û her çar perçeyanê Kurdistanî de cinî raştê teda, hêrîş, şîdet û qetlîaman yenê. 

Cinîyê Kurd û Kurdistanî rastê hêrîşanê dewletanê serdestan yenê û zaf cinî zî binê teda û şîddetê camêrdanê ke keyeyanê ma, kargehanê ma, kolananê ma û her cayê cuya ma de yê yenê.

Na roja 8ê adare de zî, çi heyf ke Kurdan bi 50 milyon nifûsê xo hema zî nêeşkayê mîyanê dewletanê xoseran yê dinya de cayê xo bigîre. Her çendêk nîmeyê cematê Kurdistanî cinîyan ra yeno pê zî, la cinîyê Kurdan Tirkîya û Bakurê Kurdistanî de heqê perwerdeyîya ziwanê xo yê dayike ra nêeşkenê îstîfade bigîrê. Cinî heqê komelkî, ekonomî, beşdarîya cuya polîtîkî û warê heqê perwerdeyî de neheqîyêka pîle vînenê.

Şer û şîdet tewr zêde tesîrêko xerab ser cinîyan keno. Başurê Kurdistanî de, cayê ke dest ronîyayo ser o de zî şer, wêranî, bêaramî dewam kenê. Nimûneyo tewr verbiçiman Kurdê Êzîdî yo. Enfal de des hezaran cinî bi domananê xo yê qijkekan tena mendî. No dej do zerrîya însanan ra demêk de nêşiro, derman nêbo.

Rojavayê Kurdistanî de des hezaran Kurdî, zafê înan cinî û domanê ke semedo ke ganê xo bixelisnê, Efrîn ra, Girê Spî ra, Serê Kanî ra koç kerdê Qamişlo, Dêrik û herêmanê asayîşinan, binê bananê rijnayayeyan de û çadiran de cuyenê. Qasê nîmê nifûsê welatê xo macir bîyê. Bê kar, bê elektrîk, bê awe, bê nêweşxane cuyenê. Para pîle ya birîna girane zî cinîyan ra kewta. Mîyanê na rewşe de zî cinî rastê şîdetî yenê.

Rohilatê Kurdistanî de tena mîyanê cuye de ney, yasayê dewleta Îranî de di hiqûqî estê. Hiqûqê camêrdan û huquqê cinîyan. La Îranî seypeyîya cinî û xamêrdan tena sehpayê îdamî de esta;  cinî zî  sey cinîyan yenê îdamkerdene.

Wezîyetêko winasî de ma vanê, wa 8ê Adare biba roja azadkerdena ala azadîya cinîyan, wa biba roja berzkerdişê ala azadîya Kurdistanî. 

Ewro hem sey cinsîyetêko bindest, hem zî sey qismêkê cematê Kurd û Kurdistanî vera şîddet, tacîz, destdergî, wêranî, neheqî û zulmê ke ma raşte ci ameyî, bi rûmetî ma vengê azadî, seyyewbînî û edaletî berz kenê. 

Cinî perceyêkê komela ke ma tede cuyenê yê la ma zaf heqanê xo ra mehrum ê. Ma do rêxistin û xebatanê xo yê taybetan zî vera cîyatîya cinsî ya her qayde û vera neheqîyan vengê xo kenî berz, mucadeleyê xo domnenê 

Ganî ma bizane ke, azadîya cinîyan, tarîxê nerdimatî de her wext bîya mifteyê berê azadî. Her çî ra ver gere ma naye bizane. 

Ma zanê û ganî ma bizane ke cinî, helqeya ewilî ya heme erc, edet, ziwan û kulturê netewî ya Kurdan ê. Cinî mabênê vizêr, ewro û sibarojî de pird ê. 

Belê, azadîya cinîyan beşêk û katalîzorêk a azadîya heme beşanê komele ya etnîkî, cinsî, dînî, mezhebî û cematî ya.

Ma na hişmendî de yê ke, cinîya birêxistin, temînatê komela seypê û azad a; temînatê netewêka birexistin a. 

Cinîyê Kurdan her tim bîyê hedefê dewletanê serdestsan. La cinîyanê Kurdan çi rey vera çok ronênayo. Pêruna serehewanayîş û şeranê Kurdan de cayê xo girewtê, xo ver dayê.

Ma sey cinîyanê Kurdan û Kurdistanî wayîrvejyayîşê destvistişanê federe yê Başûrê Kurdistanî û destvistişanê Rojavayê Kurdistanî sey wazîfeyêkê xo yê neteweyî, niştimanî zanenê. Ma vanê ’’Azadî semedê Kurdistanî û cinîyan rê, heme şarê ma rê azadî Kurdistan de ’’.

Ma bi nê hîsan roja cinîyan a dinya û ya heme cinîyanê Kurdistanî pîroz kenê.

Ma cinî yê, xurt ê û eşkenê!

08.03.2021

Komîsyona Cinîyan a Partîya Azadîya Kurdistanî-PAK