Daxuyanîya PAKê wiha ye:

Li Efrînê keçeke Kurd a bi navê Melek Nebîh Xelîl ku 16 salî bû, bi destê terorîstên OSOyê ve hate qetil kirin. Terorîstan ev keça Kurd revandin, tecawuz kirin û paşê jî kuştin.

Melek Nebîh Xelîl di roja 23yê gulana 2020an bi destê Tugay a Sultan Mûrad a ku beşeke OSO ya terorîst e, hate revandin û di roja 5ê hezîrana 2020an termê wê li nêzî Firîzîye ya gundê navçeya Azezê hate dîtin.

Ew terorîstên OSOyê yên  ku Melek Nebîh Xelîl kuştine, bi alîkarî û piştgirîya Dewleta Tirkîyeyê li Efrînê karên nemirovane dikin.

Helbete ev ne cara yekem e ku keçên Kurdan tûşî destdirêjî, tecawuz, şîdet û kuştinan dibin.

Di dema hemû qetlîamên li Bakurê Kurdistanê de, li Rojhilatê Kurdistanê, li Enfalê û li qetlîamên din yên li Başûrê Kurdistanê de keç û jinên Kurdan tuşî êrîşên hovane û cinsî bûne, hatine revandin û qetil kirin.

Herî dawî di êrîşên DAIŞ a terorîst û hov de bi hezaran keçên Kurdên Êzidî wek êsîr ketin destê DAIŞê, tûşî tecawuzan bûn, li bazaran hatin firotin, hatin kuştin.

Ev karên ne mirovane, ev êrîş û destdirêjî û kuştin îro li Rojavayê Kurdistanê berdewam e.

Qurbanî û xeleka herî dawî ya van tecawuz û qetlîaman jî li Efrînê keça Kurd Melek Nebîh Xelîl e.

Em wan terorîstên ku keça Kurd Melek Nebîh Xelîl kuştine û yên li pişt wan in, rûreş dikin.

Divê ew hovên qirêj û piştgirên wan baş bizanibin ku dê bi tu awayî nikaribin rê li ber doza gelê me ya rewa bigirin.

Buroya Çapemenî û Ragehandinê ya PAKê