Merkezê Xeberan

“Mîyanê 10 rojanê peyênan de Ewrûpade çar kurdê welatperwerî nêweşîya Corona ra wefat kerdî.

Ma perê bi xemgînîyêka pîle xebatkarêkê azadîya Kurdistanî Weqas Lordînî (Cabîr) ke ciwantîya xo ra heta nika bê rence û bê hesab têkoşîn dabi, seba nêweşîna corona Parîs de vindî kerd. Weqas şarê Dilokî (Entabî) ra bi.

Rojêk wefatê kek Weqasî ra ver  lajê seydayê Cîgerxwînî, Keyo (Kesra) Cîgerxwîn Stockholm de rehmet kerdbi. Keyo Cegerxwîn rayberanê Partîya Averî û Kurd yê Sûrîya ra bi. Hetêk ra zî mîyanê Hemkarîya Hêzê Kurdistanî û mîyanê Federasyona Komeleyanê Kurdistanî yê Swêdî de xebitîyabi.

Hewteyêk verî zî, 16yê na aşme de xebatkarê azadîya Kurdistanî Yaşar Öner zî nêweşîya corona ra wefat kerdbi. Yaşar Öner Ixdirê Agirî ra bi. Lajê Elîyê Resûl Begî bi. Elîyê Resûl Beg şervananê Serewedaritişê Agirî ra yewêk bi û embazê Îhsan Nûrî Paşa bi. Yaşar mêrdê Bîrsene û zamayê kek Mehdî Zana yo.

Heto bîn ra kurdêko xebatkar û gazîyanê qetlîamê Maraşî ra Hayrî Ergönul ke 12 îlone ra dima amebi London,  nêweşîya corona ra wefat kerd.

Hemwelatîyêkê ma yo bîn zî o ke bi eslê xo Maraş ra yo, Îngilîstan de nêweşîya korona ra wefat kerd.

Aşkereyo ke lîsteya kesê ke ma do seba corona windî bike bi nê 5 kesan nêmana, do derge biba. Gere ma tay welatanê Ewrûpa de tay hemwelatîyanê xo  hayîrdar bike. Vindîkerdişê şexsanê Kurdistanî  qybêko pîl o.

Rojawanê Ewrûpa de nifûsêk pîl ê hemwelatîyanê ma yê Kurdistanî esto. Vîrusê corona ê welatan de vila bîya. Ganî ma zanayîş û dîrektîf, nîzam û qaîdeyê sazîyanê dewleta ke ma tede cuyenê bîyare ca, her çî ra ver xo bipawe û pey ra komela xo bipawe.

Rey-rey ma rîsk qij vînenê, tedbîranê muhîman nêgênê. Çi heyf ke gorê malumatan qismêk Kurdê ma ê Maraşî komeleyanê xo de bi nêweşîya corona kewtê, rewşa qismêkê înan giran a.

Ganî ma şarê xo bi heme rayîr û metodan tehlûkeyê corona ra bipawe, tedbîrê xo bigîre û înan perwerde bike. Ganî ma yewbînan ra hayîdar be û yewbînan rê wayîr vejîyê.”

29.03.2020

 PAK-Ewrûpa

Hetgirê PAKî yê Ewrûpa