Ziwanê kurdkî semede cuyayîş û dewamî û estbîyayîş miletê Kurd heykelêkê esasî yo, bingehê miletbîyayîşî yo.

Helbet ke ewro xebata semedê destvistişê heqê perwerdeyîya ziwanê kurdkî, ma rê wezîfeyêko esasî yo netewî, niştimanî yo. Ganî têkoşîn û xebata destvistişê heqê perwerdeyîya ziwanê kurdî û resmîbîyayîşê ziwanê kurdî, bi hişmendîya destvistişê statuyêka neteweyî, coxrafîk, sîyasî ya Kurdistanî, bi armancê destvistişê heqê qederê xo tayînkerdişê miletê Kurd bêra kerdene.

La ewro Bakurê Kurdistanî de semedê wayîrvejyayîş û averberdişê ziwanê kurdkî, kam senî, çi gaman bierzo gerek ma desteg bide ci û hetê înan bike. Ganî ma pêrûna xebate û dezgeh û hewl û gamanê semedê ziwanê kurdkî rê wayîr vejîyê.

Ewro Bakurê Kurdistanî de ziwanê kurdkî binê tedayî û neheqî û tehlukeyêkê pîlî de yo.

100 serrîyo ke Dewleta Tirkîya bi sîyasetê înkar û asîmîlasyonî waşt ziwanê Kurdkî(Kurmancî û Kirmanckî/Zazakî) çîne biko. Helbet ke nê sîyasetê şowenî tesîrêko xirab Bakurê Kurdistanî de cematê Kurd ser o kerd. La tu sîyaset û kerdêna Dewleta Tirkîya nêeşkay miletê Kurd û ziwanê ey çîne biko. Ewro estbîyayîşê miletê Kurd, estbîyayîşê ziwanê kurdkî, berhemê têkoşîn û xoverdayîş û wayîrvejyayîşêko bêhempa yo.

Ewro wayîrvejyayîşê ziwanê kurdkî, mîyanê keyeyî de dest pêkeno.

Ganî heme Kurdî mîyanê keyeyê xo de bi kurdkî (kurmancî û kirmanckî/zazakî) qisey bikê. Ganî no, wazîfeyê ma yo ewil o netewî û însanî bo. Dibistana ewilî ya tutanê Kurdan mîyanê keyeyanê înan o. Dadî û babî û keyeyê Kurd, ganî qiseykerdişn û musayîş û musnayîşê ziwanê Kurdkî sey wazîfeyêkê xo yê wîcdanî, însanî û netewî bizanê.

Ganî ma cuyayîşê xo yê rojanî de, karê xo de, bazaran de ziwanê Kurdkî sey ziwanê ewil bixebitne.

Helbet ke semedê rastîya miletê ma, ma mecbur ê ke pa ziwanê Kurdkî, ziwanê Tirkî zî xebata xo ya sîyasî de bixebitne. La ganî heme partîyê Kurd û Kurdistanî heme xebate û têkilîya mabeyne xo de, xebatanê xo yê mîyanê şarî de, siyasî de ziwanê kurdkî sey ziwanê esasî bixebitnê. Heme endamê partîyanê Kurd û Kurdistanî ganî ziwanê xo yê maye bizanê, bimusê, bixebitnê.

Ganî dezgehê sivîlî, sîyasetmedar, roşnvîr, hunermend, alimê dînî musayîş û xebitnayîş û wayîrvejyayîş û averberdişê ziwanê kurdkî sey wazîfeyêko însanî û netewî bizanê.

Ganî ma sey Kurd, seemdo ke ziwanê kurdkî bibo ziwanê perwerdeyî, bibo ziwanê fermî bêrê têhet û ganî Dewleta Tirkîya nê heqê meşrû, neteweyî, însanî Qanûnê Bingehîn û heme yasayanê xo de qebûl biko.

Ziwanê ma estbîyayîşê ma yo. Bi na hişmendîye ganî ma estbîyayîşê xo rê wayîr vejîyê. Ganî 365 rojê serre semedê ma rojê ziwanê kurdkî bo.

15.05.2023

Buroya Çapemenî û Têkilîye ya PAKî