"12ê Îlona 1980î de artêşa Dewleta Tirkîya bi serekîya Sererkanê artêşa Tirkîya Kenan Evrenî de darbeyêka eskerî kerd.

Darbeya 12ê îlona 1980î de Vakurê Kurdistanî û Tirkîya de sehezaran kesî ameyê tepiştene û ameyê îşkence kerdiş. Se hezaran kesî mecbur mendî ke welatê xo caverdê û koç bikê. Seyan kesî ameyê kiştene û dardekerdene. Des hezaran kesî zî erzîyay hepisxaneyan.

Heme partîyê sîyasî, sendîka, dezgeyê sivîlî, heme dezgeyê mixalîf ê çapemenî ameyî qedexe kerdene.

Armancê esasî yê darbeya 12ê îlona 1980î no bi ke, înan kerd ke, vernîya hereketa azadî, dewaya azadîya Kurdistanî bigîrê, Tirkîya de têkoşînê azadî bişiknê, demokrasî, edalet û seypeybîyayîş çine bikerê.

Derbeya 12ê îlona 1980î, darbêka pîle da hereketa netewî-demokratîk ya Vakurê Kurdistanî û hereketa demokrate, azadîwaşte û çepê Tirkîya ro.

Derbeya eskerî ya12ê Îlona 1980î ra dima, Zindana Dîyarbekirî ya hûmar 5ine de îşkence, zulum, kovîtî û qetlîamî sey faşîzmê Hîtlerî bîy.

La sey heme teşebusê verênî yê Dewleta Tirkîya derbeya 12ê îlona 1980î zî nêeşka têkoşînê dewaya azadîya Kurdistanî vindarno.

Dewleta Tirkîya serranê 1990î de zî, gama ke dewaya azadîya Kurdistanî aver şîye, bi na hişmendîya derbeya 12ê îlona 1980î, vera şarê Vakurê Kurdistanî û demokrat û azadîwazanê Tirkîya şerêko qilêrin eşt dewre. 17.000 hezar kesî bi destê Dewleta Tirkîya, bi namê ‘faîlî meçhûl’ ameyî qetlkerdene. Neheqî, îşkence, zulum û bêbextî û qetlîamî demê ‘faîlî meçhûl’an de amê kerdene.

Dewlet Tirkîya ewro zî tena Vakurê Kurdistanî de ney, Vaşûr û Rojavayê Kurdistanî de zî bin a hişmendîya derbeya 12ê îlona 1980î têgêrena. Dewleta Tirkîya ewro zî bi hişmendîya dişmenetîya miletê Kurd, seba ke wa Kurdî cayêkê dinya de statûyêka sîyasî, heqêko netewî nêgîrê, Kurdan rê hêrîş kena, înan rê neheqî kena û na kerdena xo ra nêvîyarena.

Belê, hişmendîya darbeya 12ê îlone ya 1980î ewro zî dewam kena. Dewleta Tirkîya ewro zî bi hişmendîya darbeya 12ê îlone ya 1980î yena îdarekerdene.

Dewleta Tirkîya 40 serrî verî, bi derbeya 12ê îlona 1980î waşt ke, dewaya şarê ma ya azadî û xelisyayîşî çine biko; la ewro dewaya azadîya Kurdistanî her ca de dewam kena.

Dewleta Tirkîya 97 serrîyo ke nê sîyasetê xo yê şer, qetlîam, neheqî û dişmenetîya Kurdan ra mird nêbîya, bes nêkerda û dersêk zî kerdenanê xo ra nêgirewta.

Çi heyf ke mesulê kiştiş, îşkence û heme xerabîyê demê derbeya 12ê îlone nêameyê muhakemekerdiş. Ne ey amê muhakemekerdiş ne zî mesulê kiştiş, îşkence û xerabîyê demê ‘faîlî meçhûlan’ amê muhakemekerdiş. Seba ke vizêr kesêk ra hesab nêame perskerdiş, ewro zî êyê ke Dewleta Tirkîya îdare kenê, faîlanê demê ‘faîlî meçhûl’an dir hevaltî kenê, înan rê ardim kenê, şarê ma rê neheqîya xo domnenê.

La nê sîyasetê Dewleta Tirkîya do nêreso meqsedê xo ke xeyal kena. Dewaya azadîya Kurdistanî bi rayîr û raybazê meşrû, sivîl, sîyasî do bireso armancê xo ya meşrû.

Seba na raştîye zî, ma bi minasebetê serrgêra derbeya 12ê Îlone ya 39ine, reyna venga Dewleta Tirkîya dane ke, wa fek nê sîyaset û hişmendîya xo ya pûçe ra verado. Wa fek şer, binpay kerdişê azadîya fikrî û xorêxistinî ra verado. Meseleya Kurd û Kurdistanî meseleya azadî, demokrasî û edaletî ya, meseleyêka terorî nîya; Meseleyêka sîyasî ya û çareserî zî gere bi dîyalog, bi rayê sîyasî bêra peyda kerdene.

Serrgêra derbeya 12ê Îlone ya 40ine de ma heme caardiş û netîceyanê derbeya eskerî-faşist reyna lanet kenê."

12.09.2020

Buroya Çapemenî û Têkilî ya PAKî