Partîya Azadîya Kurdistanî (PAK):

“Gorê xeberê ke ameyê vilakerdene, dewa Xisare ya Kercewsê Batmanî de, kênayêka 15 serrî ke semedê dejê madeyî şîya nêweşxane lavejyayo orte ke digan a. Kênaya ke Serdozgerîye rê gerre kena û vana mi rê tecawûza ameyo kerdene, derheqê qewimyayîşî de tehqîqat dîyeno dest pêkerdene.

Gama ke tehqîqat yeno hîrakerdene, yeno îdîakerdene ke polîs, çawişê pisporî û cerdevanî zî mîyan de, nameyê 27 kesan erzîyeno mîyanê tehqîqatî, la no hetê Serdozgerîye ra nêno qebûlkerdene. Gorê malumatê ke ameyê vilakerdene 27 kesan ra tena nameyê 11 kesan kewto mîyanê dosya.

Îdîa beno ke, nê polîs, esker û cerdevanan, tena kênaya 15 serrîye rê ney, eynî wextî de bi hawayo sîstematîk eynî de dewe 2 cînîyanê binan rê îstîsmaro cinsî û tecawiz kerdê û înan ser fuhûş ferz kerdê.

Dewleta Tirkîya,  senî ke vîzêr Mûsa Orhan serbest verada û o bêceza verda, ewro zî Kercews de, na hedîseya qilêrine de zî dosya ser o qerarê mîyankî daya û kena ke tecawizkaran bê ceza verdo.

La, ma zanê ke, m abi tecrübeye xo yê serran ra zanê ke, hêzê asayîşî yê Dewleta Tirkîya, cinîyanê Kurdan ser o şîdet û tecawuz  sey metodêkê şerê qilêrinî xebitnena. Tecawiz, Kurdistan de vera cinîyanê Kurdan her wext sey çekek o.

Polîs û eskerî û hêzê asayîşî yê Dewleta Tirkîya heta ewro bi seyan rey hêrîş û şîdet û tacîzê cinsî berdê cinîyanê Kurdan ser, la semedê nê kerdênan tu kes nêameyo ceza kerdene. No zî cesaret dano tay kesê ke Kercews de no hêrîş û tacîzkeran û nê çîyî uca de zî newe ra ameyê kerdiş.

Ma sey Partîya Azadîya Kurdistanî, na helweste û hişmendîya Dewleta Tirkîya zî, nê kerdênê hêzê emnîyetî yê dewlete zî teşhîr kenê û şermezar kenê.

Perse na ya;

1- Gelo qey Serdozgerî, dosya ser o qerarê nimiteyî daya û wazena biko mîyankî?

2- Gelo derheqê qewimyayîşî de çend versûcî estê, înan ra çebd hebî hêzê emnîyetî yê û gelo çend hebê înan tepişti yê?

Ma vengê raya pêroyî yê Kurdistanî û Tirkîya û vengê êyê ke heqanê cinîyan pawenê, Baroyanê avuqatan, rêxistinê heqê merdiman, heme hetanê sîyasî yê Kurdistanî danê ke wa na dosya nêzdî ra teqîp bikê û ma nêverde ke tecawizkarî onca bêceza bimanê û mîyanê şarî de bi hawayêko azad bigêrê.”

07.12.2020

Buroya Çapemenî û Têkilîye ya PAKî