Roja 17.09.2022yê li Berlîn a bajarê Elmanyayê , bi meşeke girseyî Dr.Sadiq Şerefkendî, hevalên wî û hemû şehîdên Kurdistanê hatin bibîranîn.

Partîya Demokrat a Kurdistana Îranê(PDK-Îran) ev meş û bibîranîn organîze kir, lê ji her çar perçeyên Kurdistanê gelek partîyên sîyasî, sazî û kesayetên welatperwer jî beşdarî vê bibîranînê bûn.

Endamê Komîteya Birevebir a Navendî ya PAKê Mîrza Akar, endamên Meclîsa PAK Ewropayê Osman Çinar û rêvebir û endam û alîgirên PAKê(Partîya Azadîya Kurdistanê) jî beşdarî vê bibîranînê bûn.

Di merasîma bibîranînê da li ser navê Partîya Demokrat a Kurdistana Îranê(PDK-Îran) Xalid Ezîzî axaftinek kir.

Herweha li ser navê Meclîsa PAK Ewropayê jî peyamek ji Komîteya Amadekar a bibîranînê ra hate şandin.

Ev jî teksta vê peyamê ye:

Dr.Sadiq Şerefkendî û hevalên wî şehîdên Kurdistanê ne û em wan bi giramî bibîrtînin

Dr.Sadiq Şerefkendî 30 sal berê ji alîyê Dewleta Îslamî ya Îranê ve li gel hevalên xwe, rêvebirên PDK Îranê Fetah Ebdolî û Humayûn Erdelan, di roja 17ê Îlona 1992yan da li Elmanyayê, hatin şehîd kirin.

Berîya Dr. Sadiq Şerefkendî, di 17ê Temûza 1987ê da Dr. Abdûrahman Qasimlo û 2 hevalên xwe dîsa ji alîyê Dewleta Îslamî ya Îranê ve li bajarê Vîyanayê hatibûn şehîd kirin.

Qetil kirina Dr.Qasimlo û Dr.Şerefkendî, berdewamîya hişmendîya wê dewleta dagirker a Îranê ye ku , pêşewa Qazî Mihemed û hevalên wî di sala 1947ê da darve kiribûn.

Dr. Sadiq Şerefkendî, hevalê Dr. Qasimlo bû, û bi vê hevaltîyê bibû endamê PDK Îranê. Dr. Sadiq Şerefkendî, ew alaya Pêşewa Qazî Mihemed û Alaya Dr. Qasimlo li erdê nexist, bi dilsozî bû kedkarekî doza azadîya Kurdistanê û gava hate şehîd kirin, Sekreterê Giştî yê PDK Îranê bû.

Dr. Sadiq Şerefkendî,birayê biçûk ê HEJAR ê welatperperê Kurd û helbestvanê mezin yê Kurdistanê, bû.

Dr. Sadiq Şerefkendî, mirovekî zanyar bû û li unîwersîteyê mamosteyekî weha bû ku hemû xwendekaran bi rêzdarî jêhezdikirin.

Dr. Sadiq Şerefkendî, serok û rêberekî zana û qebûlbar ê di nav partîya xwe da bû, pêşmergeyek bû, kadirekî sîyasî bû, berpirsekî gihîştî yê ragehandin û çapemenîyê bû, di navbera hêzên neteweyî û niştimanî yên Rojhilatê Kurdistanê da pireke cîhê bawerîyê bû, kesayetekî qebûlbar ê di nav alîyên Îranî yên demokrat û azadîxwaz bû. Dr. Sadiq Şerefkendî, rewşenbîr bû, pêşengekî fedekar, dilsoz û qebûlbar bû di nav gelê Rojhilatê Kurdistanê da.

Qetil kirina Dr. Sadiq Şerefkendî, Dr. Qasimlo û hevalên wan, nîşana wê yekê ye ku Dewleta Îranê ji hêza gelê me yê Rojhilatê Kurdistanê, ji PDK Îranê û ji kesayetîya van rêberên gelê Kurdistanê ditirse.

Dr. Sadiq Şerefkendî, Dr. Qasimlo û hevalên xwe, şehîdên hemû Kurd û Kurdistanê ne, şehîdên me ne.

Em Dewleta Îranê careke din jî ji ber van qetlîamên ku kirine rûreş dikin.

Di 30emîn salvegera şehadeta wan de em Dr. Sadiq Şerefkendî û hevalên wî û hemû şehîdên azadî û rizgarîya Kurdistanê bi giramî bi bîr tînin.
Şehîd nemir in
17.09.2022

Meclîsa Piştgirên PAKê yên Ewropayê

Bixwîne: PAK: Em Dr. Sadiq Şerefkendî û hevalên wî bi giramî bibîr tînin