Roja 10ê Teşrîna Peyêne ya1948î de vilaweka Cihanmişûlî ya Heqanê Merdiman a ke 30 madeyan ra yena pê, Heyetê Pêroyî yê Neteweyê Yewbîyayî de amey qebûlkerdene û na roje a roje ra nat sey Heqê Merdiman yê Dinya yena pîrozkerdene.

Vilaweka Cihanmişûlî ya Heqanê Merdiman Şerê Diyinî yê Cîhanî ra dima amey qebûlkerdene. O wext heqê merdiman xeylê amebi binpaykerdiş, coka na roje sey roja heqê merdiman ya dinya ameya qebûlkerdene.

Qedîyayîşê Nazîzimî û faşîzmî ke seba merdimatî trajedîyêka pîle bîy ra dima, seba ke wa merdimatî reyna rastê wina yew çî nêra, Netewê Yewbîyayî na roje sey Roja Heqanê Merdiman qebûl kerda.

La demêkê kilmî de vejîya orte ke, dewletê ke Vilaweka Cihanmişûlî ya Heqanê Merdiman qebûl kerdê, ê bi xo na vilaweke binpay kerdê.

Şerê Dinya yê Diyînî ra dima, 2 blokî virazîyabî. Blokê Rojawanî û Blokê Rojhilatî. Çi heyf ke her di Blokan zî Vilaweka Cihanmişûlî ya Heqanê Merdiman seba menfiatê xo xebitna. Key ke Blokêk heqê merdiman binpay kerd, biloko bîn wayîrê heqanê merdiman vejyêne. Eslê xo de her di Blokî zî Vilaweka Cihanmişûlî ya Heqanê Merdiman binpay kerdêne. Bi taybetî zî derheqê miletanê bê dewletan de, her di blokan zî heqê merdiman û heqê miletan peygoş kerd.

Wexto ke Sîstemê Di Blokî rijîya zî na neheqîya ke miletanê bê dewletan rê bîye zî, şaranê binan rê bîye zî dewam kerd.

Ewro eke ma behsê miletanê ke heqê înan ê însanî û netewî yenê binpaykerdiş, bê teredut, ma do bivîne ke şarê Kurd rêza yewine de yo.

Ma ewro behsê Vilaweka Cihanmişûlî ya Heqanê Merdiman kenê, la dezgeyo ke îcabê na roje nêardo ca û binpaykerdişê heqanê merdiman rê sey temaşekerdox vindeto zî Miletê Yewbîyayî bi xo yo.

Sere de waye û birayê ma yê Kurdê Êzidî û heme Miletê Kurd verê çimanê Netewê Yewbîyayî de rastê hêrişê kovanê yê DAIŞî ame.

Ewro zî verê çimanê Netewê Yewbîyayî de Miletê Kurd rastê hêrişan û neheqîyan yeno.

Nika ma pers bike: Ma verê îmzekerdişê na vilaweke bide kiştêk, 10ê Teşrîna Peyêne ya 1948î ra nata, seba ziwanê Kurdkî yo qedexekerde, seba heq û azadîyê netewî yê Kurdan, seba jenosîd û qirkerdişê ke Kurdan ser bîyê, seba îşkence û zindankerdişan, seba heqê azadîya fikrî Netewê Yewbîyayî hetanî nika se kerdê?

Seba Kurdê ke heqê înan her 30 madeyê Vilaweka Cihanmişûlî ya Heqanê Merdiman de bi hawayêko aşkere amê binpaykerdiş Netewê Yewbîyayî hetanî nika se kerdê?

Ma serrgêra qebûlkerdişê Roja Heqanê Merdiman ya Cihanmişûlî de veng danê Neteweyê Yewbîyayî û welatanê eleqadaran û pawitoxanê heqanê merdiman: "Goş bidêne na qîrîna însanî ya şarê Kurdî ke 50 mîlyonî ra zêdêr o. Seba caardişê heqanê merdiman yê bingehînî ê şarê Kurdî, seba qezenckerdişê heqanê Kurdan ê ke mîyanê Vilaweka Cihanmişûlî ya Heqanê Merdiman amê qebûlkerdene, ma veng danê ke wa ca cade gamî bêrê eştene’’.

Heto bîn ra ma venga dewletanê Tirkiya, Îran, Iraq û Sûrîye danê ke, wa hukmê Vilaweka Cihanmişûlî ya Heqanê Merdiman bîarê ca.

10.12.2021

Buroya Çapemenî û Têkilîye ya PAKî