Buroya Çapemenî û Têkilîye ya PAKî:

Tarîxê Kurdistanî de serewedarişanê en muhîman ra yew zî ‘Serewedaritişê Şêx Seîdî’ yo. Seke yeno zanayîş hadrekarîya nê serewedaritişî hetê Teşkîlatê Azadî ra dîyabi

dest pêkerdene.

Teşkîlatê Azadî serra 1925î de ame ronayene. Xalid Begê Cibrî û Yusuf Zîyaf Beg rayberê Teşkîlatê Azadî bî.

La çi heyf ke hadrebîyayîşê serewedaritişî ra ver, dewleta Tirkîya pê hesîya û 2 rayverê Teşkîlata Azadî kerdî hepisxane.

La çi heyf ke, Dewleta Tirkîya, seba ke vernîya serewedaritişî bigîro, citmenga 1924î de vere cû Yusuf Ziya Beg o ke rayveranê Hereketa Azadî ra bi tepişt, dima ra zî 20ê çeleyê 1924î de zî Xalid Begê Cibrî ame tepiştiş. Dewleta Tirkîye her di rayberê Kurdan erşawîtî Hepisxaneyê Bedlîsî.

Tepişyayîşê Xalid Begê Cibrî û Yûsûf Zîya Begî ra pey, bi provakasyonêkê Dewleta Tirkîya serewedaritiş demê xo ra ver dest pêkerd. Û rayverê netewî, dînî û cematî yê şarê Kurdistanî Şêx Seîdî serekîya nê serewedaritişî kerd.

Gorê qerarê Dîwanê Herbî yê Bedlîsî ke Dîwanêkê Herbî bi û hetê îxtîdarê taybetî yê Dewleta Tirkîya ra amebi wazîfedar kerdene, roja 14ê Nîsana 1925î de, Bedlîs de Xalid Begê Cibrî û Yusuf Ziya Beg amê kiştene. Xalid Begê Cibrî bi guleyan ame kiştene; Yusuf Ziya Beg zî ame dardekerdene. Her di rayberê şarê Kurdistanî, semedê adherkerdişê Teşkîlata Azadî yê seba serewedaritişêkê netewî amê qetil kerdene.Eynî roje de bi qerarê Dîwana Herbî ya Bedlîsî Elî Riza Beg, Bahaddîn Beg, Faîk Beg û Mele Evdirrehmanê Şirnexî zî ameyî dardekerdene.

Çi heyf ke heta ewro zî cayê mezelê Xalid Begê Cibrî , Yusuf Ziya Beg Elî Riza Beg, Bahaddîn Beg, Faîk Beg û Mele Evdirrehmanê Şirnexî zî sey cayê mezelanê Şêx Seîd, Seyîd Riza û hevalanê înan, cayê mezelê Seîdê Kurdî heta ewro zî hetê Dewleta Tirkîya ra nêameyê eşkere kerdene.

Ma bi nê minasebetî ra reyna venga Dewleta Tirkîya danê ke wa cayê mezelê Şêx Seîd, Seyîd Riza û hevalanê înan, cayê mezelê Sêîdê Kurdî, Xalid Begê Cibrî,Yusuf Ziya Beg Elî Riza Beg, Bahaddîn Beg, Faîk Beg û Mele Evdirrehmanê Şirnexî eşkere biko.

Ma sey PAK(Partîya Azadîya Kurdistanî) xo dewamîya raybazê Teşkîlatê Azadî, dewamîya têkoşînê Xalid Beg û Yûsûf Zîya Beg vînenê û seba armancê înan o Kurdistanêko azad têkoşîn danê.

Serrgêra şehadete înan a 97ine de, ma Xalid Begê Cibrî, Yusuf Zîya Beg, Elî Riza Beg, Bahaddîn Beg, Faîk Beg û Mele Evdırrehman Şirnexî û heme şehîdanê Kurdistanî bi hurmet yad kenê.

14.04.2022

Buroya Çapemenî û Têkilîye ya PAKî