Partîya Azadîya Kurdistanî derheqê qedexebîyayîşê Kayê Kurdkî ‘Bêrû’ de beyanatêk da û na kerdena dewleta Tirkîya şermezar kerd.

Beyanatê PAKî yo nuştekî de wîna vajîya:

Amebi plankerdiş ke hetê kaykerdoxanê kayê Tîyatroyî yê bi namê 'Teatra Jiyana Nû'  ra roja sêşemeyê 13ê na aşme de saete 20.30 de Sehneyê Gazîosmanpaşayî yê Şaredarîya Îstanbulî de bi namê 'Bêrû: Klakson, borizan, birt' kayêkê Kurdkî biamêne kaykerdene. La çend saete mendbi ke kay bêro kaykerdiş, kayê Tîyatroyî hetê Qaymeqamîya Gazîosmanpaşayî ra ame qedexe kerdene.

Walîyê Îstanbulî Alî Yerlikayayî hesabê xo yê Twitterî ra derheqê kayê bi namê ‘Bêrû’ ke hetê Qaymeqamîya Gaziosmanpaşayî ra amebi qedexe kerdene de beyanatêk da. Walî Yerlikayayî beyanatê xo vato ‘Qaymeqamîya Gaziosmanpaşayî kayê bi namê “BERU” semedo ke Kurdkî ya ney, semedo ke mîyan de propagandaya PKK estbîyo ameyo qedexe kerdene. Derheqê mesela de prosesê hûqûqî  dîyayo dest pêkerdene’.

Seyan kesê ke vera PKK vejyenê, PKK qebûl nêkenê, semedo ke ala Kurdistanî  hesabê xo yê medyaya sosyale ser ra pare kerdê, bi îdîaya 'Propagandaya PKK kerdê' ra derheqê înan de tehqîqat ameyo  akerdene, cezaya hepisxaneyî girewtê.

Endam û îdarekarê PAKî ke eleqeyê înan bi PKK çin yo, semedo ke PKK rexne kerdê û fikre xo yê ke programê PAKî de ca gênê  nuştê, pare kerdê; hezaran sîyasetmedarî, nuştoxî, ronşvîrê ke bi nuşteyanê xo PKk rexne kerdê, fikrê xo beyan kerde derheqê înan de bi îdîaya  'Propagandaya PKK kerdê' ra tehqîqatî ameyê akerdene, cezaya hepisxaneyî ameya dayene.

Nika zî Walîyê Îstanbulî kayê tîyatroyî ‘BÊRÛ’ bi bahaneyê semedo ke Kurdkî nîya, semedo ke mîyanê ci de propagandaya PKK bena kerdo qedexe.

Nêbo no qedexe zî sey verî kesê ke tu eleqeyê înan bi PKK çin yo, la bi îdîaya ‘Propagandaya PKK kerdê’  ameyo ronayîş û bahaneyêk o?

Qanûnê Komara Tirkîya û heme qanûnanê aye de ziwanê Kurdî ser o qedexeyêko zelal û bêşîrove esto. Ma eşkenê derheqê bêtehemulîya Tirkîya ya vera ziwanê Kurdkî de seyan nimûneyan bidê.

Qedexekerdişê kayê tîyatroyî yê Kurdkî ‘BÊRÛ’ vera Kurdkî bêtehemulîya peyêne nîşanê ma dano.

Bi waştişê hukmatê AK Partî û şirîkê ey MHP hetê Wezîrîya Perwerdeyî ya Netewî ra mîyanê kitaban ra pêro çekuyê  'Kurd' ameybî vetene.

Hetêk ra kanalê televîzyonî yê TRT KURDΠ bê bingehê qanûnî hetê dewleta ra weşan kena, hetêk ra Unîversîteyan de kêm bo zî Beşê Ziwanê Kurdkî bi qismî perwerde danê la hetêk ra zî ziwanê Kurdkî rê dezgeyanê dewlete de û her cayê cuye de bêtehemûlî dewam kena.

Ma muameleyo keyfî ke ziwanê Kurdkî rê beno şermezar kenê.

Her tewir aktîvîteya hûnerî  sey kerdişê ’ Propagandaya PKK’ namekerdiş û qedexekerdişê ey, esasê xo de, fikr û xorêxistinkerdişî ra tersayîş o û dişmenetîya Kurdkî yo.

Qedexekerdişê Kayê Tîyatroyî yê bi namê ‘BERÛ’ tesaduf yan zî  ‘Propagandaya PKK’ nîyo, bi zelalî nîşanê sîyasetê dişmenetîya  Kurdkî yo.

Ma venga îdarekarê dewleta Tirkîya danê ke, wa fek sîyasetê vera Kurdan ra veradê û wa fek her tewir qedexeyê vera Kurdkî ra verado.

Miletê Kurd zî vera sîyasetê dişmenetîya Kurdkî her wextî ra zêde gereka wayîrê ziwanê xo vejîyo.

14.10.2020

Buroya Çapemenî û Têkilîye ya PAKî