"PAK(Partîya Azadîya Kurdistanî)

Serdozgerê Mehkemeya Berze ya Dewleta Tirkîya roja 17.03.2021 de Mehkemeya Qanûnê Bingehîn de,  derheqê HDPyî (Partîya Demokratîke ya Şaran) de dewaya qefilnayîşî akerd.

Serdozger îdîa keno ke ‘HDP dewamîya PKK-KCK ya rêxistina çekdare ya terorî ya û bi bahaneyê yekpareyîya erdê Tirkîya, semedê bawerî û aramîya şarî, gere bêra qefilnayîş’.

Her çiqas Serdozger sebebê qefilnayîşê HDP sey vatişanê corî nîşan dano zî, eslê xo de aşkerayo ke sebebê bahaneyê qefilnayîşî huqûqî nîyo, sîyasî yo.

Seke yeno zanayîş serra 2019 de,  semedo ke nameyanê înan de ‘Kurdistan’ esto, derheqê PAK (Partîya Azadîya Kurdistanî), PSK(Partîya Sosyalîst a Kurdistanî) , PDKT(Partîya Demokrat a Kurdistanî ya Tirkîya), KKP(Partîya Komunîst a Kurdistanî) de zî  dewayê qefilnayîşî ameybî akerdiş.

Dewaya qefilnayîşî ya ke derheqê PAKî û 3 partîyan bînan de ameya akerdiş dewam kena.

Dewleta Tirkîya hetêk ra derheqê partîyan de dewaya qefilnayîşî akena,  heto bîn ra zî nêverdena partîyê neweyî ê sey PDK-Bakur, PIA û PDK benê ronayene.

Dewaya qefilnayîşî ya derheqê HDPyî de ameya akerdiş , bin pakerdişê heqê azadîya fikrî, azadîya xo îfade kerdişî û xebata rêxistinî ya. PAK  ke derheqê ey de doewaya qefilnayîşî ameya akerdiş, helbet ke no teşebus û hewlê Dewleta Tirkîya, hewlê Serdozgerê Mehkemeya Berze, yê derheqê qefilnayîşî yê HDPyî de zî sey gamê ke nênê qebûlkerdiş hesibneno.

Rîpelê tarîxê Dewleta Tirkîya bi padayîşê zaf partîyan dekerde yê. La senî ke hetanî ewro qefilnayîşê partîyan, astengkerdişê partîyan tu mesela û problem çareser nêkerdo, ewro ra tepîya zî do tu mesela û probleman çareser nêko. Êyê ke wazenê partîyanê yasayî, sîyasî biqefilnê, gelo wazenê Kurdan rayîr û  metodanê sivîl, sîyasî, demokratîk dûr bifînê û verê înan bidê şer û şîdet?

Ma bi zelalî wazenê beyan bike ke, ma do nêkewe dama nê xêrnêwazan. Ma do bi qerardarî şer rê, her tewir rayîr û metodê şer, çekdarî û şîdetî rê vaje, ‘ney’. Qefilnayîşê partîyan rayîrê viraştişî û awankerdişî nîyo. Destpêkê çareserî qebûl kerdişê estbîyayîşê miletê Kurd û heqê neteweyî, demokratîk o.  No zî bi hişmendîya seypeyîye, bi rayîrê aştîyane, sîyasî, bi dîyalogî mimkun o. Heto bîn ra eştişê gamê seba azadî, demokrasî, edalet û seypeyî encax Tirkîya eşkena rayîrê çareserî xurt biko.

Ma venga heme îdarekeranê Dewleta Tirkîya, partîyanê sîyasî û Dadgeha Qanûnê Bingehînî danê ke gorê hûqûqê  mîyanneteweyî û qiraranê Dadgeha heqanê Merdiman a Ewropa û gorê Medeyê 90in yê Qanûnê Bingehînî yê Dewleta Tirkîye hereket biko. Ma bi taybetî venga Wezaretîya Zereyî ya Dewleta Tirkîya danê ke wa fek nê teşebusanê xo yê keyfîyan ra verado û gorê Qanûnê Bingehîî û Qanûnê Partîyan hereket biko.

Nêbo ke partîyê sîyasî rîyê fikir û bername û xebatanê xo yê sîyasî ra bêrê padayîş, no nêno qebûl kerdene."

19.03.2021

Buroya Çapemenî û Têkilîye ya PAKî