PAK (Partîya Azadîya Kurdıstanî):

Nê serranê peyênan de ma şahîd benê ke, Kurdistan û Tirkîya de tay goristanan rê hêrişî benê, mezelî yenê şikitene.

Wan, Çewlîg, Amed, Mûş, Colemêrg û qezaya Şirnexî Hezex de mezelanê PKKyî ke verê cû merdbî ameybî şikitene.

Aydin de zî mezelê Elewîyan rê hêriş ame kerdene û mezelî ameyî perçekerdene. 

Taxa Mêrdînî Çilesiz (Mezre Mihoka) de Gorê Hesen Begî yê Êzîdî yo 300 serreyin ame şikitene, kerrayî û sembolî amê perçekerdene.

Dewa Yolverenî ya Batmanî ya Êzîdîyan de Mezelê Sara Gînî ke sey pîrê Êzîdîyan amêne qebûlkerene ame şikitene. No mezel hezar serrî bi.

Heto bîn ra Taxa Mara ya Semsûrî de Gorostanê Suryanîyan de kerrayê çend mezelan ameyî şikitene.

Qezaya Amedî Farqîn de Cendirmeyanê Dewleta Tirkîya keyeyan rê telefon akerd û înan ra va ‘’Gere şima ê herfanê q, x û w êyê ke mezelan ser o amê nuştene werabidê. Eke şima vatişê ma nêkerê ma do mezelan pêro perçe bike’’. 

En peynî 19ê Kanûna 2017î de Goristanê Garzanî yo ke Taxa Yukarıölekî (Oleka Jor) ya Bêdlîsî  de ca gêno ra bê xebera keyeyan esteyê 282 tenan uca ra amê vetiş, erşawîyay Dezgeyê Tiba Edlî yê Îstanbulî (ATK) û esteyê 261 kesan mîyanê qabanê plastîkan de, kişta Goristanê Kilyosî de binê peyarayîrî de amê ronayîş. Dîmenê na kerdena hukmatî, medya de ameybî parekerdene.

Eke ma bala xo bide hêrişê ke goristanan rê benê, mesajo ke wazenê bidê zelal o. Nê heme hêrişê ke benê, eleqeyê xo bi dewlete esto û no zaf balkêş o. Senî ke heqê cuyayîşê her merdimî esto, gorê bawerîya xo definkerdiş zî heqê her merdimî yo. 

Hêrişê ke goristanan rê benê, binpaykerdişê ercanê dînî, wicdanî û manewî yo. No sûcê merdimayî yo. Heto bîn ra gorê qanûnanê Tirkîya û hûqûqê mîyannetewî zî sûc o.

Gere Dewleta Tirkîya êyê ke goristanan rê hêriş kenê, înan vejo orte û gere dewleta Tirkîya semedê îdîayanê goristanê Kilyosî beyanato resmî bido.

Ma nê pêro hêrişê ke sey sûcê merdimayî yê lenet kenê, îdarekaran ra wazenê wa tedbîran bigîrê.

23.05.2020

Buroya Çapemenî û Têkilîye ya PAKî