Serekê Pêroyî yê Partîya Azadîya Kurdistanî (PAK) Mustafa Ozçelîkî û Hetkarê Serekê Partîya Sosyalîst a Kurdistanî (PSK) Bayram Bozyelî îtîfaqê mabênê her di partîyan û xebata yewbîyayîşê PAK û PSKî ser o qisey kerd.

Serekê Partîya Azadîya Kurdistanî (PAK) Mustafa Ozçelîk vano, ma hadre yê ke, esasanê neteweyî û demokratîkî ser o her partîyêka Kurdistanî dir bibe yew, yan zî îtîfaqêk rone.

Mustefa Ozçelîkî wina va: “Roja ronayîşê PAKî ra heta ewro ma bi aşkera vanê ke, partîyê ke hetê program û sîyasetî ra nêzdîyê yewbînan ê, gere mîyanê yew partî de ca bigîrê. Vakurê Kurdistanî de i partîyêka azadîwaştoxe, millî, demokratîk û Kurdistanî rê lazimtî esta. Ma nê esasan ser o partîya xo na ro. Ma serra  2014î ra nata partîyanê Kurdistanîyan dir zaf xebatê ortaxî kerdî. La her ke şi înan verê xo da cayanê binan. Nika ma û PSK mendê û ma xebatanê xo bi pîya  kenê.”

Ozçelîkî da zanayîş ke, seba ke partîya înan û PSK bibê yew partî înan xebatî kerdî la hetê PSK hema zî qerarê xo nêdayo û wina va: “Ma sey Partîya Azadîya Kurdistanî bi aşkera vanê, ne nameyê partîya ma ne serekê partîya ma xeta sûre nîyê ke ma yewna partî dir bibe yew partî. Ma hadre yê ke PSK û partîyanê bînan êyê ke nêzdîyê ma yê dir bibe yew.”

Ozçelîkî derheqê yewitîya partîyanê Vakurê Kurdistanî de zî wina va: “Ma nika nêeşkenê Vakurê Kurdistanî de pêruna partîya bike yew û xora no rast nîyo zî. Ma vanê ke, partîyê îslamî yê Kurdistanî eşkenê mîyanê xo de bibê yew, partîyê sosyalîst û komunîst zî eşkenê mîyanê xo de bibê partîyêk. Ma xo sey partîyêka neteweyî, demokrat û Kurdistanî name kenî. Mîyanê ma de kesê sekûlerî û yê dîndar zî eşkenê ca bigîrê. Ma xo sey partîyêka sosyalîste, komunîste yan dîndar nêvînenê. Ma eşkenê hetkarî bidime yewbînî. La heyfo ke ma zereyê dikananê qijan de enerjîya xo xerc bike, no lûksê ma nîyo.”

Meseleya yewitîya PSK û PAKî de Bayram Bozyelî zî wina va: “Meseleya yewitî meseleyêka stratejîk a. Seba ke meseleya Kurd meseleyêka milî ya, na mesela bê yewitî safî nêbena. Lazim o ke sîyasetê Kurdan vera dişmenanê xo qewetê xo bikê yew.