Merkezê Xeberan

Şarê Rojhilatê Kurdistanî, Îranî û Iraqî no demêk o rejîmê Îranî protesto keno.

Iraq de, xususî herêmê Şiînişîn de çalakiyê şarî yê vera Hukmatê Bexdadî no aşmîyo ke dewam kenê. Şarê Iraqî vera feqîrîye, vayî û çînîya xizmetî razînêbîyayîşê xo nişan dano, vera zulum, zordarî û neheqîye dewaya azadî û demokrasî keno.

Ma hetkarî danê çalakîyanê şarê Iraqî ê meşrû û ê ke şîdet û tûjî ra dûr ê.

Hukmatê Iraqî ganî waştişê şarî bîyardêne ca la bi şîdet  hêrişê çalakvanan kerd û hîna zî keno. Heta nika rîyê zordarî û hêrîşanê hêzanê eskerî û mîlîsanê Dewleta Iraqî ra  seyan kesî amê qetilkerdiş û hezaran kesî birîndar bîyê.
 
Heto bîn ra qismêk hetê sîyasî yê Iraqî wazenê protestoyanê şarî xo rê bikê firsend ke, qezenc û heqanê şarê Kurdistanî, Qanûnê Bingehînî û Sîstemê Federalî de  orte ra wedarê.
 
Gere heme hetê Vaşûrê Kurdistanî bi sîyaset û pîyatîya netewî vera nê plananê leyminan hayîdar bê û helweste bigîrê. Pawitiş, averberdişê heme qezencanê şarê Kurd û Kurdistanî yê Destûrê Federalî wazîfeyêko netewî û niştimanî yo. Naye ra ma venga Parlamento, Hukmatî û heme partîyanê sîyasî yê Herêma Kurdistanî danê ke, wa dîyalogê xo yê Hukmatê Iraqî de, seba pawitiş û menfietanê şarê ma têbigêrê

heto bîn ra no demêk o Rojhilatê Kurdistanî û Îran de zî  des hezaran kesî vera rejîmê gonîwer yê Îranî serewedarito, vejyayo kuceyan û meydanan.
 
Dewleta Îranî heqê benzînî kerd zêde û dima ra Rojhilatê Kurdistanî û Îranî de des hezaran kesî bi protestoyan, bi grev û çalakîyanê sivîlan zêdekerdişê heqê benzînî protesto kerd.

Dewleta Îranî sey Hukmatê Bexdayî protestoyan rê bi şeklo kovane mudaxele kerd. Rojhilatê Kurdistanî û Îranî de heta nika netîceyê nê hêrişan de desan kesî amê kiştene, seyan kesî zî birîndar bîyê. Protestoyê şarî hîna zî bi şeklo komkî dewam kenê.

Protestoyê ke ewro Rojhilatê Kurdistanî û Îranî de benê, hetêk ra seba feqîrî û bêedeletî benê, hetêk ra zî seba rejimê diktatorî yo nijadperest û mezhebî yê Farisî benê.

Protestoyê ke ewro Rojhilatê Kurdistanî û Îranî de benê, hetêk ra verba feqîrîye, vayîye û çinbîyayena xizmetî  benê la bi estê xo de seba heqanê netewî û demokratîk yê şarê kurdî; seba demokrasî benê û şarê ma bi no qayde azadîya xo û federalîzm wazeno.

Coka rejîmo şoven û zordar yê Îranî Rojhilatê Kurdistanî de bi hawayêko tuj hêrişê çalakvanan keno û bi seyan kesanê sivîlan û bêçekan qetil keno.

Ma têkoşîno ke şarê ma yê Rojhilatê Kurdistanî seba azadî, seba edalet, demokrasî û cuyêko bi rûmet dano, sey têkoşînê xo vînenê û ma kişta way û birayanê xo yê Rojhilatê Kurdistanî de ca gênê û ma hetkarî danê înan.

Ewro Rojhilatê Kurdistanî de mabênê heme partîyanan de ronayîşê îtîfaqê netewî û demokratik heme deman ra zêde lazim û tarîxî yo.

 Ma hetkarî danê protestoyanê meşrû yê şarê Rojhilatê Kurdistanî û Îranî

Ma şîdet û hêrişê Dewleta Îranî yê ke protestoyanê sivîlan rê benê şermezar kenê.

Ma veng danê Netewê Yewbîyayî, Amerîka, Rûsya, Yewîya Awrupa, Yewîya Erebî, rêxistinê mîyannetewî yê heqanê merdiman, raya pêroyî ya dinya û wazenê wa seba têkoşînê azadî, demokrasi û edaletî hetkarî bidê şarê Îranî, Rojhilatê Kurdistanî û Iraqî. Gereke şima pêro-pîya na kerdena Dewleta Îranî û Iarqî ya ke merdimatî ra dûr a rê vajê ‘bes o’.” Gere şima bi hawayêko xurt hetkarî bidî qezencanê şarê Kurdistanî yê Qanûnê Bingehînî yê Federalî yê Iraqî.

27.11.2019

PAK(Partîya Azadîya Kurdistanî)        

PSK(Partîya Sosyalîste ya Kurdistanî)