Partîya Azadîya Kurdistanî-PAKê, ewro 29.06.2021 Amed de bi minasebetê serrgêra  96ine ya şehîdbîyayîşê Şêx Seîdî û 46 hevalanê ey ê ke ey reyde ameyê dardekerdene panelêk tertîp kerd.

Panêl saete 11. 00 de Teşkilatê PAKî yê Amedî de ame dayene.

Destpêk de de semedê Şêx Seîd, hevalanê  ey û pêruna şehîdanê dewaya azadîya Kurdistanî rêz ame girewtene.
 
Gelêk saziyê çapemenî, temsîlkarê rêxistinanê sîvîlan, ronşvîr û siyasetmedarê Kurd beşdarê panêlî bîy.

Panêl bi qalîkerdişê vervatoxê Çapemenî yê PAKî Henifî Turan dest pêkerd. Henifî Turanî Şêx Seîd û hevalê ey yad kerd û beyanatê PAKî yê derheqê şehadetê Şêx Seîd û hevalanê ey de wend.

Beyanatê Partîya Azadîya Kurdistanî-PAK wîna yo:

Serekê Netewî yê Hereketa Netewî a Kurd a 1925î Şêx Seîd û 46 hevalê xwu 96 serr verî roja 29.06.1925 de, hetê Dewleta Tirkîya ra ameyê dardekerdiş.

Şêx Seîd û embazê xwu, hetê mehkemayêka korsane ra bi şeklêko bêhûqûqî û bi binpaykerdişê hûqûqê mîyanneteweyî, bi cezaya îdamî Berê Koyî yê Amedî de darde bîyê.
Dewleta Tirkîya heta nika zî cayê mezelê Şêx Seîd û hevalanê ey eşkera nêkerdo.

Dewleta Tirkîya, gereka semedê nê dardekerdişan şarê Kurdistanî ra uzrê xo biwaza û cayê mezelanê şehîdan eşkera bika.

Dewaya ke Şêx Seîd û embazanê xwu seba ci cuya xwu feda kerda, bi şehadetê sehezaran torinanê Şêx Seîdî, bi xebat û mucadeleyêko welatperwerane, ewro zî her çar perçeyê Kurdistanî de berdewam a.

Şêx Seîd û heme şehîdê dewaya azadîya Kurdistanî, sey 50 mîlyon Kurdanê cîhanî û heme Kurdistanijan, paweyê mijdanîya azadî û xoserîya Kurdistanî yê.

Bi her hawa serkewtiş û statuteyêko sîyasî her parçeyê Kurdistanî de, do ruhê şehîdanê ma şad biko.

Serrgêra înan a 96ine de ma Şêx Seîd û 46 hevalanê ey ê ke ey reyde ameybî dardekerdiş, Xalid Begê Cibrî, Yusuf Ziya Beg, Elî Riza Beg, Bahaddîn Beg, Faîk Beg, Mele Evdirrehmanê Şirnexî, Dr.Fuad, Hecî Axtî, Seyid Abdulkadîr û deshezaran merdimê ke demê serewedaritiş û serewedaritişî ra di serrî badê cû ameyê qetil kerdiş û heme şehîdanê Kurdistanî bi hurmet yad kenê.

Dima ra zî qalîkerdoxê panêlî Tahsin Sever (Nuştox) qalîkerdişêk kerd û behsê Rêxistina Azadî, Xalît Begê Cibirî û Yusuf Ziya Begî û têkoşînê înan kerd.

cigêrayox Kerem serhatli zî  qalîkerdişê xo de behsê keyeyê Şêx Seîdî,  hereketa ey, hereket senî dest pêkerd, senî dewam kerd û senî qedîya kerd.  
 
Panêl bi pers û cewabdayîşê panêlîstan qedîya.

Herwiha panel jialîyê Çarpel Medya û Rüdawê ve bi zindî hat weşandinê.

Rûpela Nû/Diyarbekir