PAK (Partîya Azadîya Kurdistanî) bi minasebetê serrgêra wefatê rayberê miletê Kurd Mele Mistefa Barzanî ya 43ine roja 01.03.2022y Amed û Êlih (Batman) de kombîyayîşê yadkerdişî organize kerd.

Teşkîlatê Amedî yê PAKî de bi beşdarîya endamê PAKî û xeylî roşnvîr û sîyasetmedaranê Kurd, rayberê miletê Kurd Mele Mistefa Barzanî ame yadkerdiş. Telewîzyonê Kurdî zî yadkerdişî bi ganî weşana.

Kombîyayîşê yadkerdişî yê Amedî bi rêzgirewtişê semedê Mele Mistefa Barzanî û heme şehîdanê Kurdistanî dest pêkerd.

Vervatoxê PAKî Hanîfî Tûranî şi meymanan ver û nameyê PAKî ser o muhîmî û rolê Mele Mistefa Barzanî yê  têkoşînê neteweyî yê her çar perçeyanê Kurdistanî de ard ziwan.

Hanîfî Tûranî va ‘’Raybazê Mele Mistefa Barzanî, dewamîya raybazê dewaya Şêx Seîd, Xalid Begê Cibrî, Seyid Riza, Îhsan Nurî , Pêşewa Qazî Mihemed o… Semedê Mele Mistefa Barzanî û semede pêrûna şehîd û kedkaranê têkoşînê azadî, xelasî û xoserîya Kurdistanî, do xelata tewr pîle, yewitîya heme hêzanê neteweyî, welatperwerî bo; do înan rê wayîrvejyayîş û wayîrvejyayîşê destfînayîşê Herêma Fedrere ya Kurdistanî bo; do azadî û xoserîya Kurdistanî bo’’.

Qalîkerdişê Hanîfî Tûranî ra dima, cigêrayox û nuştoxê Kurd Kerem Serhedî derheqê cuyayîş, têkoşîn, vîr û bawerî, raybaz û xebatanê rayberê miletê Kurd Mele Mistefa Barzanî de semînerêko berhemdar da.

Kerem Serhedî va ‘’Rayîrê Serek Mele Mistefa Barzanî yê nêmerdî rayîrê netewî yo. Temamê cuyayîşê ey rayîrê Kurd û Kurdistanî de derbas bi. Mele Mistefa Barzanî semedê Kurdan rayberêko pîl o. Ma ewro zî rayîrê ey ra şinê’’.

Semînera Kerem Serhedî ra dima, roşnvîro Kurd Şêx Mîzbeh şîîrêk derheqê Mele Mistefa Barzanî de wend. Roşnvîr û sîyasetmedarê Kurd Îbrahîm Guçlu û Muhîtîn Batmanî zî derheqê cuyayîş û têkoşîn û rolê netewî yê Mele Mistefa Barzanî de fikrê xo vatî

Teşkîlata Batmanî yê PAKî de zî yadkerdişê Mele Mistefa Barzanî estbi

PAKî Êlih (Batman) de zî bi minasebetê serrgêra wefatê rayberê miletê Kurd Mele Mistefa Barzanî ya 43ine, roja 01.03.2022 kombîyayîşê yadkerdişî kerd.

Yadkerdiş  bi rêzgirewtişê semedê Mele Mistefa Barzanî û heme şehîdanê Kurdistanî û bi Marşê Netewî Ey Reqîb dest pêkerd.

Serekê Teşkîlatê Batmanî yê PAKî Azîz Ozdemîr şi meymanan ver nameyê PAKî ser o muhîmî û rolê Mele Mistefa Barzanî yê  têkoşînê neteweyî yê her çar perçeyanê Kurdistanî de ard ziwan.

Azîz Ozdemîrî va ’’Alaya Kurdistanî ya ke Pêşewa Qazî Mihemedî teslîmê Mele Mistefa Barzanî kerd, tu rey nêkewt war. Û a alaya ke Mele Mistefa Barzanî teslîmê pêşmergeyanê Kurdistanî kerdbi, bi xeylê dej û zulm û qetlîaman, la bi têkoşînê pêşmergeyanê qehreman, bi têkoşînê heme kedakarê dewaya azadîye Başûrê Kurdistanî de ewro ser Parlamentoya Kurdistanî de Hewlêr de têra şîyena’’.

Qalîkerdişê Azîz Ozdemîrî pey roşnvîro Kurd Şêxmûs Hemo ser Mele Mistefa Barzanî şîîrêk wend.

Dewamê programê yadkerdişî de vîdeoyêk ser cuyayîş, têkoşîn û muhîmîya rayberê neteweyî yê Kurd Mele Mistefa Barzanî ame mojnayîş.

Heto bîn ra vîdeoyêka şîîran ser roşnvîr û sîyasetmedarê welatperwerê Kurd rehmetî Seydayê Gurdilî û deyrêka hunermendê welatperwerê Kurd rehmetî Seîd Yûsûf amey goşdarîkerdene.

Endamê PAKî û xeylê roşnvîr û sîyasetmedarê Kurd beşdarê yadkerdişê Mele Mistefa Barzanî yê Teşkîlatê Batmanî yê PAKî de bîy.

01.03.2022

Buroya Çapemenî û Têkilîye ya PAKî