Parêzgarê Kerkûkê Rêbiwar Taha di bernameya Bestoon Talk de ku doh bi şev hat weşandin, diyar kir ku ew dê mijara “Alaya Kurdistanê ya di destê de peykerê Pêşmerge de çareser bikim.”

Parêzgarê Kerkûkê Rêbiwar Taha li Kerkûkê bû mêvanê bernameya Bestoon Talk a ku Bêstûn Osman pêşkeş dike û bersiv da pirsên xelkê Kerkûkê.

Rêbiwar Taha li ser çend mijarên parêzgeha Kerkûkê ya Başûrê Kurdistanê yên wekî ziman, perwerde, jîngeh, projeyên veberhênanê, kûçikên beredayî û hwd. bersiv da pirsên xelkê.

“Bila zarokên vî bajarî her çar zimanan zanibin”

Rêbiwar Taha li ser bikaranîna zimanê Kurdî ya li zanîngeh û daîreyên fermî got:

“Ez wekî Kerkûkiyekî dixwazim ku her kes bi her çar zimanan Kurdî, Erebî, Tirkmenî û Suryanî biaxive, bi taybetî bi her sê zimanên sereke.

Rast e, salên borî li vî bajarî Erebkirin hatiye kirin, belge vê yekê diselimînin.

Ez bi xwe li Parlamentoya Îraqê tevlî jêbirina paşmayên Erebkirinê bûm.

Wekî Kerkûkiyekî ez dixwazim zarokên vî bajarî her çar zimanan zanibin.”

Rêbiwar Taha li ser pirsa wergera pirtûkên xwendinê ya li zimanê Kurdî anî ziman:

“Derbarê wergerandina pirtûkan de, li zanîngehan komîteyeke taybet a ji bo wergerandina pirtûkan li zimanê Kurdî heye.

Dekan neçar in hinek kesan bînin ku pirs û nivîsan wergerînin, kes nikare li ber vê bigire. Kê asteng kir, werin cem min.”

Taha li ser bikaranîna zimên jî got:

“Destûra bingehîn bikaranîna ziman garantî dike.

Carinan dibe ku mamosteyek li dijî xwendekarekî tundrew fikirîbe yan jî tevgeriyabe lê nabe ku ev ji bo hemû mamosteyan were giştîkirin.”

“Bi Kurdî nizane, hewl bidin bi Erebî biaxivin”

Taha li ser pirsgirêkên li pêşiya perwerdeya Kurdî jî anî ziman:

“Carinan hinek mamosteyên birêz bi hizreke cuda tevdigerin lê xwendekar azad in ku bi dilê xwe bersivê bidin.

Min îro li Sergeranê bi cotkarên Kurd re hevdîtinek kir. Di civînê de fermandarê leşkerî yê heman herêmê jî hebû.

Ez bi xwe hem bi Kurdî hem jî bi Erebî axivîm, min ji cotkaran re got ku fermandarê leşkerî ji Bexdayê ye û bi Kurdî nizane, hewl bidin bi Erebî bi wî re biaxivin ku ji pirsgirêka we fêm bike.

Ji ber vê yekê pir girîng e ku hûn zanibin bi kê re û çawa dipeyivin.”

Taha behsa hebûna neteweyên cuda yên li Parlamentoya Îraqê kir û got:

“Me gelek caran li parlementoyê gotiye, hinek parlementer bi Kurdî diaxivîn.

Wê demê ji 329 parlamenteran 65 Kurd bûn û yên mayî Ereb, Tirkmen û pêkhateyên din bûn.

Kes ji te fem nake lê di nivîsên fermî de hemû ziman hene.”

“Min xwest bi Kurdî jî were nivîsandin”

Rêbiwar Taha diyar kir, ji dema ku desthilatdariya bajêr girtiye destê xwe wî Tirkmenî û Suryanî jî li hemû belgeyên fermî zêde kiriye û da zanîn:

“Li hinek deveran li ser tabelayan zimanê Kurdî nehatibû nivîsandin, min xwest bi Kurdî jî were nivîsandin.

Her kes azad e ku bersivê çawa û bi kîjan zimanî bide, ya girîng ew e ku kesê li hemberî te ji te fem bike.”

“Em Kurd li Kerkûkê ber bi nemanê ve diçin”

Xwendekarê Zanîngeha Kerkûkê yê bi navê Mihemed ji Parêzgar pirsî:

“Niha dema di nava taxên Kerkûkê re derbas bibî, alayên cur bi cur dibînî, ya Îraqê, ya Tirkmenan û neteweyên din.

Em jî wekî Kurd mafê me ye ku em alaya xwe bilind bikin.

Niha Kurdek bi cil û bergên Kurdî di nava Kerkûkê re derbas bibe hest bi nebûnê dike.

Em Kurd li Kerkûkê ber bi nemanê ve diçin. Tu dikarî vê çareser bikî?”

“Kesî wekî berê negot alayê daxe”

Rêbiwar Taha di bersiva pirsa Mihemed de got:

“Her welatiyekî Kerkûkî di bilindkirina alaya xwe de azad e.

Beriya 3 rojan Festîvala Şanoya Kolanan hat lidarxistin û ji welatên Erebî û yên Ewropayê şanoger hatin serdana Kerkûkê.

We bi xwe dît ku li ser rêya Bexdayê bi hemû hespsiwaran re Alaya Kurdistanê jî hebû û bilind kiribûn. Çima kesî wekî berê negot wê alayê daxe.”

Bêstûn Osman pirsa Alaya Kurdistanê ya ku 16ê Çiriya Pêşîn a 2017an ji peykerê Pêşmergeyê li Kerkûkê hat daxistin kir.

Rêbiwar Taha li ser danîna Alaya Kurdistanê ya li ser peykerê Pêşmerge got:

“Ez dê wê çareser bikim.”