Parlamentera  Partiya Çepên Kesk (YSP) Sumeyye Boz ragihand ku li parêzgehên Bakurê Kurdistanê bi hincetên “ewlehiyê” birîna daran û têkdana xwezayê berdewam e û got: “Tenê li Şirnexê  di sê salan de zêdeyî 500 hezar ton dar hatine birîn.”

Parlamentera YSPê ya Mûşê Sumeyye Boz roja Çarşemê 21ê Hezîrana 2023an di axaftina xwe ya li  Parlamentoya Tirkiyê de bal kişand ser mijara birîna darên daristanan û têkdana xwezaya parêzgehên Bakurê Kurdistanê.

Sumeyye Boz dîmenên axaftina xwe ya li Parlamentoyê li ser hesabê xwe yê medyaya civakî belav kirin û got: “Li Kurdistanê bi birîna daran  xweza tê jinavbirin û mirov bo koçê tên neçarkirin. Mirov tên neçar kirin ku wan navçeyên hatine talankirin bicihbihêlin. Em polîtîkayên ewlehiyê qebûl nakin.”