Parlamenterê Mehabadê yê li Meclisa Şûraya Îslamî ya Îranê Celal Mehmûdzade diyar kir, nêzîkî %70ê dirûşm û sozên Serokomarê Îranê Îbrahîm Reîsî nehatine cîbicîkirin û heta berevajî wan bûye.

Celal Mehmûdzade ji ajansa Îlna ya Îranê ragihandiye, Serokomarê Îranê Îbrahîm Reîsî di dema bangeşeya hilbijartinan û nasandina kabîneya xwe de çendîn dirûşm û soz dan, lê belê %70ê wan nehatiye cîbicîkirin û berevajî wan bûye.

Mehmûdzade li ser aboriya Îranê û enflasyona li welat diyar kiriye: “Biryar bû biha ji bihayên sala borî bilindtir nebe, biryar bû bihayê derman zêdetir nebe, rêjeya enflasyonê kêm bibe û her sal derfetên kar werin ragihandin û milyonek xanî werin çêkirin, lê belê ji van ti yek nehatin cîbicîkirin.”

Herwiha li ser pêwendiyên navbera Meclisa Şûraya Îslamî û hikûmetê diyar kir, peyamek li paş wan kartên zer ên ji hikûmetê re hatine dayîn heye û gotiye “peyam wê ew e ku hikûmet bernameyên Meclisê cîbicî nekiriye û pêwendiya navbera van herdu saziyan roj bi roj lawaztir dibe”.