Parlementoyê Kuurdistanî 6ê Temmuze de kom beno. Dîwanê Serekîya Parlementoyê Kurdistanî heme parlementeran ra waşt wa beşdarê kombîyayîşê 10inî bibê.

Keyeypelê resmî yê Parlementoyê Kurdistanî ra bi îmzaya Sereka Parlementoyî Vala Ferîde beyanat ame dayîş û heme parlementeran ra ame waştiş ke wa 6ê Temmuze de beşdarê kombîyayîşê 10inî bibê.

Beyanat de ame vatiş ke, kombîyayîş do 6ê Temmuze saete 11:00 de bo. Beyanat de nêame vatiş ke kombîyayîş do çi çî ser o bêro qiseykerdiş. 

Goro ke vajîya do kombîyayîş de kabîneya newe ya hukmatê Kurdistanî bêra aşkerakerdiş. 

Vizêr mesulanê  PDK ra Zana Mela Xalîdî da vatbi, PDK prosesê ronayîşê hukmatê newî qedînay.  7ê Temmuze de Parlementoyê Kurdistanî kom beno. Heme partî û hetî do kombîyayîş de ca bigîrê. Heme partîyan ra ameyo waştiş ke wa kabîneya newî ya hukmatê newî de ca bigîrê.

Zana Mela Xalîdî da zanayîş ke, heme partîyê sîyasî gere heta 11ê na menge temsîlkaranê xo aşkera bikerê. 

Vizêr ney perê mesulanê YNK Hacî Mesîfî zî vatbi  heta di hewteyan do kabîneya newî ya hukmatê Herêma Kurdistanî bêra aşkerakerdiş.

Seke yeno zanayîş 11- 06- 2019 de Parlementoyê Kurdistanî , Mesrûr Barzanî  seba  ronayîşê Hukmatê Herêma Kurdistanî kerbi wezîfedar.