Merkezê Xeberan- Partîya Vatanî ya ke serekê aye Dogu Perînçek o û partiyêka faşîst û dişmenê kurdan a, waşt wa peyker, name û nîşanê Seyîd Rizayî ke Dêrsim de meydan, cade û kuçeyan de ca gênê bêrê wedaritene û îmhakerdene!

Sekreterê pêroyî yê Partîya Vatanî, Utku Reyhan walîtî û beledîya Dêrsimî rê mektubêk erşawit û waşt wa peyker, name û nîşanê Seyîd Rizayî ke Dêrsim de meydan, cade û kuçeyan de ca gênê bêrê wedaritene û îmhakerdene!

Nê mesulê Partîya Vatanî, mektubê xo yê dergî de vato, xora Seyîd Riza seba xîyaneto ke Dewlete rê kerdbi, ameyo dardekerdene. Xora PKK zî ewro rêça ey ser ra şina û dewaya “xoeserîye” kena!

Bi vatişê nê siyasetmedarê tirkî, ferqêk mabênê peykerê Seyîd Riza û peykerê mesulanê PKK de çin yo, coka gere ca de peykerê ey bêro wedaritene 

Peykerê Seyîd Rizayî  29ê Temmuza 2010î de hetê veledîye ra amebi viraştene.

Seyîd Riza, lajê ey Reşîk Husên, Dêrsimê Husênê Demenanî, Hesen Husênê Qureyşanî, Seyîd Husênê Qureyşanî, Eliyê Kalanî û Findik Axayê Yûsifanî serra 1937î de şewêk hetê dewleta Tirkîya ra Meydanê Genimî yê wîlayetê Xarpêtî de ameybî îdamkerdene.

Îdamkerdişê Seyîd Rizayî û hevalanê ey ra dima qirkerdisê Dêrsimî dest pêker. Mabênê serranê 1937 û 1938î de des hezaran Dêrsimijî amê qetlkerdene û ê ke ganî mendê zî amê surgunkerdene.