Navenda Hevkariyê ya Partiyên Kurdistana Îranê ku ji 4 partiyan (PDK, PDKÎ, Komeleya Zehmetkêşan ya Kurdistanê û Komeleya Şoreşger ya Zehmetkêşan ya Kurdistana Îranê) pêk tê, li ser gefên fermandarê supaya pasdarên Îranê daxuyaniyek belav kir.

Di daxuyaniyê de hat gotin ku ew dever û cihên ku Îran gefê lê dixwe, kampên penaberên siyasî ne ku ji ber siyaseta zalimane ya Îranê koçber bûne.

Partiyên Rojhilatî destnîşan kirin, Îranê li behaneyan digere da ku alozî û xirabkariyên zêde bike lê ew gef û tehdîd wan ji xebatên wan sar nake.

Herwiha partiyên Rojhilat bang li civaka navdewletî, hikûmetên Iraq û Herêma Kurdistanê kirin sînorekî li pêşiya gef û zêderewiyên Îranê deynin û li dijî wan gefan derkevin.

Hêjayî bibîrxistinê ye, îro Duşemê Fermandarê Hêza Bejayî ya Supaya Pasdaran a Îranê General Mihemed Xakpûr, gef li partiyên Rojhilatî yên ku navendên wan li Herêma Kurdistanê ne xwaribû û gotibû, ew ê êrîşî wan bikin ji ber ku çalakiyên wan li ser sînor “asayişa Îranê” dixin metirsiyê.

Xakpûr herwiha daxwaz ji xelkê Herêma Kurdistanê jî kiribû ji baregehên wan partiyên dûr bikevin.