Navenda Nûçeyan - PDK dibêje, “Em gelek nîgeran in li ser girjî, alozî, operasyonên serbazî, bombebaranên Tirkîye û Îranê bo ser xaka Herêma Kurdistanê ku bûne sedema dilrewîya hemwelatîyên sivîl û neseqamgirîyê li navçeyên sînorî yên Herêma Kurdistanê.”

Herwiha di daxuyanîya PDKê de hatîye gotin, ku niha 500 gundên Herêma Kurdistanê li ber destê PKKê ne û hatîye dîyarkirin, “me çav lê girtîye lêbelê eger ev rewş berdewam be, ji ber bombebaranan zîyanên mezintir  dê bigihijin Herêmê û cihên din ên Herêmê jî dikevin jêr metirsîyê.”

PDK dibêje, “Pêwîst e hemû alî li wê têbigihijin ku xebat û hikûmranî bi muzayede û sîyaseta neberpirsane nayê kirin. Lewma me berî niha gotîye û em niha jî dibêjin ku em li gel xebata sîyasî û rêkarên aştîyene ne ji bo çareserkirina pirsa Kurd li perçeyên din û eger PKK û alîyên din ên çekdar nekarin pabendî biryar û hikûmranîya Herêma Kurdistanê bin, bila şer û çalakîyên xwe veguhêzin bo meydana xwe ya rasteqîne û zêdetir nebine cihê êriş û malwêranîyê bo hemwelatîyên Herêma Kurdistanê.”

Roja Înê, 19.06.2020, ji ber bombebarana firokeyên Tirkîyê li sînorê Şeladizê û Kanî Masê, 5 hemwelatîyên sivîl canê xwe ji dest dabûn.

Hikûmeta Herêma Kurdistanê jî di daxuyanîyekê de şehîdkirin û zîyangihandina bi hemwelatîyan şermezar kiribû ku her ji alîyê kê ve û bi çi sedemê hatibe encamdan û daxwaz li Tirkîyê kiribû rêz li serwerîya Herêma Kurdistanê bigire û herwiha daxwaz ji PKKê jî kiribû ku wan navçeyan vala bike ku zêdetir nebe sedema alozîyan li navçeyên sînorî yên Herêma Kurdistanê.